Kakukutu kopolifi moNamibia Lieutenant General Sebastian Ndeitunga ota popi ta ti oshiwana ita shi liufa komilandu da tulwa po konima yokangedjo koufiku. Okwa ti ombelewa yaye oya didilika ovanhu hava kala ashike tava ende manguluka konima yevili depato, omanga vamwe oha kala tava nu omalodu momapaandanda konima yepato.
Pefimbo a ninga eenghundafana naKundana Omaandaxa, Ndeitunga okwa popya ta ti oshiwana na shi fimaneke omilandu da tulwa po konima yokangedjo shaashi ku keshe omunhu ta ka monika ina hala okulifa komilandu ota ka pewa eyandukilo lopaveta.
Okwa popya ta ti Etitano eshi okwa li awaimina ovanembelewa vopolifi novakwaita vetanga leameno moshikonga eshi kwa li sha ningwa konima yeevili depato, okwa mona ovanhu vahapu ita ve lihumbata nawa.
“Ovakwashiwana ina va hala okupwilikina eshi tava lombwela kopolifi, omanga vamwe oha kala va hala okulwifa ovanambelewa vopolifi, osho shili sha nyika oshiponga neenghono,” Ndeitunga ta ti.
Okwa kunghulila opolifi novakwashiwana opo va va kale vena ekwatafano liwa nombili opo va kale tava longo noupu okukondjifa oimbuluma.
“Ovanhu aveshe na kale va fimaneka okangedjo koufiku, opolifi nai longe pauyuuki pefimbo ngeenge ili moshikonga shotula po elandulafano konima yeevili depato,” Ndeitunga ta ti.
Ndeitunga okwa ti ovanhu ashike vena omikanda dokuvapitika oku enda konima yokangedjo, ovo va pitikwa oku enda efimbo leevili depato.
Okwa popya yoo vali kombinga yovashingi veelefa dokukwala ovanhu keenhele dokokule va didilikwa ve hole okushinga komina yokangedjo, ndele kavena sha omikanda depitikilo lokuenda peevili dangambekwa.
Okwa ti unene tuu einda lopolifi lopoTjiwarongo olo limwe la didilikwa hali kala lina ovashingi veelefa vangudumana va hala okushinga konima yokangedjo.
Ndeitunga okwa ti eshi osha puka, onghee okwa ti eshi na shi mone exulilo lovanhu tava shingi konima yokangedjo.
“Opolifi ina i pitikwa oku efa omunhu tashi ngi komina yeevili depato ndele kena sha omukanda wokumupitika. Ovanhu aveshe na kale va tali kako ve fike pamwe, ndele ha kulongifa ombumbo,” Ndeitunga ta ti.
Okwa weda po ta ti opolifi oya pumbwa okufimaneka ovakwashiwana ngeenge tai popi navo, shaashi eshi otashi yandje ekwatafano liwa pokati kavo.