Hilma Nakanduungile

OSHIKUNDE - Ngoloneya gwaHangwena Sebastian Ndeitunga okwa indile aanashilonga moombelewa dhEpangelo opo ya hulithe po okungwandjagula oshigwana, uuna tashi kongo omayakulo moombelewa dhepangelo. 

Ndeitunga ndhika okwe dhi popi pethimbo a li a talele po aakalimo yomoshitopoplwahogololo shaShikunde, pamwe naakwateli komeho yoombelwa dhomayakulo gEpangelo dhayoolokathana, oshiwike sha piti. Ndeitunga ta ti, otashi yemateke noonkondo uuna oshigwana tashi ka konga omayakulo koombelewa ndhoka dha nuninwa oku shi yakula, ihe otashi adha ko aayakuli taye shi ngwandjagula nenge inaaya itula mo miilonga yawo. “Aayakuli miikondo yepangelo ya yoolokathana nosho wo aaleli yopamuthigululwakalo, natu yakuleni oshigwana nohole nonesimaneko. Okusimaneka aantu oshiwanawa noshi na elago. Uuna omuyakulwa e na uupyakadhi, mu pulakena e to mu pe omayele, ngoye to pulakena wo komayele ge, opo ashike tatu vuleni okuhuma komeho muukumwe,” Ndeitunga ta ti ngaaka.

Ta indile aakwateli komeho yoombelewa dhomayakulo gEpangelo ya kwashilipaleke wo kutya oya tula po omilandu dhokukwathela mbala mboka itaaya vulu okukala momikweyo omile ethimbo ele, ngaashi aakulupe, aanuulema nosho wo oomeme ye li momategelelo.

Ndeitunga okwa li a talele po oshitopolwahogololo shaShikunde opo a popithe oshigwana nokupulakena komashongo ngoka sha palamena. 

Pauyelele wa gandjwa kuKamnsela gwoshitopolwahogololo shika, Lonia Shinana-Kaishungu nosho wo aakalimo yomoshitopolwahogololo shika, gamwe po gomomashongo ngoka taga dhana onkandangala ongaashi: ompumbwe yomeya, oopate, omakwatathano gopaengodhi ga nkundipala, ompumbwe yuupangelo, nayilwe. Komakemo ga hololwa koshigwana, Ndeitunga okwa kwashilipaleke oshigwana kutya oompumbwe dhasho odha ndhindhilikwa nodhi shiwike, nEpangwele otali tsikile nokukwashilipaleka kutya oshigwana osha mona omayakulo, nonando itashi pwile ko oshita. 

“Kombinga yoopate, osho shili kutya Oshitopolwa shika, unene tuu kombinga yokuuzilo, oopate odha pumbwa okweendelelwa po, oshoka odhi na omafululu noonkondo. Shi na sha noomboola moshitopolwahogololo shika, Epangelo olya kwandjangela ko notali tsikile nokukwashipaleka kutya oshigwana osha mona omeya ga gwana,” Ndeitunga ta ti ngaaka.