OSHIKUKU - Omundohotola gwomeho a tseyika nawa Helena Ndume moNamibia nomuuyuni awuhe, okwa li a thigi oyendji monooli taya ligola noku mu tumbaleka, sho e ya galulile omeho. 

Ndume okwa ti okwa li a talele po iitopolwa ine yokonooli, okuza muMai gonuumvo nokwa yakula aamvu yomeho ye vule po 1 800.

“Onda li nda yakula tango aanumvu yomeho ye li 492 koRundu muMai, tandi yi kOpuwo hoka nda yakula aanumvu ye li 226 muJuni. Okwa li nda tsikile muJuli, sho nda yi kEngela hoka nda yakula aanuumvu ya thika po486 noshiwike sha zi ko okwa li nda panga aanuumvu ye li 612 kOshikuku,” ta popi ngaaka.

Momwedhi tagu ya, Ndume otaka talela po oshipangelo shaShakati.

Ta ti, oyendji a li a tanda omeho okwa li ya monoko natango, sho kwa li ya ningi ethimbo ihaaya mono ko naashona owala  inaaya mona ko molwuunene weyonauko lyomeho, ano ya tsika oshitanana.

Ndume okwa ti, okwa li a yambidhidhwa koondohotola dhAanamibia.  

Soini Leevi gwomimvo 88 okwa ti okwa li a ningi omimvo  ihaa monoko.

Leevi okwa ti ka li ha vulu oku ka taamba openzela ye nokwa li ha tumu ko aatekulu, ihe onkalo ndjika oya hulu  nuumvo, sho a li a tandwa nokumonako natango.

“Okwa li sha fa ondjodhi sho nda li nda kuthwa iiyando komeho gandje, onda mono uuyelele nonda dhimbulula kutya otandi mono ko ishewe… Otandi vulu okunyola, kandi shi we omuposi,” ta popi ta ligola ye ta pandula.

Ndinelago Timoteus okwa ti okwa kala omvula netata iha monoko, shoka sha kala sha dhigupalela onkalomwenyo ye.

Timoteus omukalimo gwokOkando okwa ti okwa li muudhigu molwaashoka ina kala e na omuyakuli megumbo, kehe ngoka a li ha kongelwa a kale naye megumbo kakwa li ha kalelele. Okwa ti okwa li ha ka pula koshipangelo uuna Ndume tayi ko, naapangi oyu uvaneke oku mu tseyithila, ngaashi ye shi ningi ngeyi. “Okwa li nda mono uuwafa oolamba, enyanyu ndi na nena kali shi okuyelekwa. Ndohotola nguka na tsikle okulonga iilonga mbika iiwanawa sigo aluhe,” ta pandula ngaaka.

vkaapanda@nepc.com.na