OSHAKATI- Ongudu yopapolitika yoNamibia Economic Freedom Fighters (NEFF) oya pula ongeshefa yoRani Group opo i kale ya wedela eendjambi dovanailonga noshoyo okuyandja oilonga tai kalele kovanailonga vayo.
Oshivike sha djako NEFF okwa li e kwetele komesho eholomadiladilo lopambili pefimbo ovanailonga vamwe voRani Group kwa li ve li mekangha tava pula omauwa moilonga yavo.
Ovanailonga voRani pamwe nongudu yoNEFF okwa li vangudumana komesho yofitola i li mOshakati nokonima oya ninga omunyano va uka kombelewa ya ngoloneya waShana noku yandja omukanda nyenyeto wavo.
Okwa didilikwa ongeshefa yoRani Group oyo imwe hai yandje omakwafo koikondo ya yooloka ngaashi okuyambidida oipangelo loikwafifo, okulandela ovapolifi oikwafifo noshoyo okulandela ovanhu ve na oulema outemba.
Ovanailonga otava nyenyeta tava ti ova loloka okufutwa eendjambi dishona, okutukwa kovahona vavo, onghalo yokuhe na oilonga tai kalele noshoyo okuha futwa oluteima ngeenge va longa eevili da pitilila.
Otava nyenyeta tava ti ina va panda eshi tava longo ve li koshi lehangano loEPSN ha li futwa koRani Group nokonima ngeenge ola futwa oshimaliwa shihapu ovanailonga oha futwa kashona.
“Otwa hala ehangano loEPSN la xulifwa po diva molwashi ota li hepeke ovanailonga. Onghee otwa hala ashike okukala hatu futwa oshimaliwa tashi dilile koRani Group pehe na ehangano limwe la wendwa li tu nyokome oshimaliwa shetu,” omunailonga ta ti.
Omukainhu umwe okwa hokolola ta ti ova hala okukala tava kwata eendjambi davo da pitile komavalulilo eembanga davo molwashi ohava pewa ashike eendjambi davo peke di li momakutu eembapila.
“Omafimbo amwe ngeenge twa ya mokafudo ohatu tetwa oshimaliwa shondjambi yetu shaashi twa ninga omafiku ina tu longa. Onghee ngeenge omunhu oha kwatwa ondjambi yeN$1200 ndele tai mokafudo ota nanwa oshimaliwa she li kwatelela komafiku kwa li e li mefudo,” umwe womunailonga ta hokolola.
Omulumenhu umwe okwa lombwela Kundana ta ti otava li tava pi eshi ihava futwa eendjambi koxulo yominwe ashike ova longifwa oilonga idjuu meefitola doRani.
“Fyee ohatu di meehiila, otuna ounona vetu hava i keefikola. Otuna oinima twe i kufa keefitola hai futwa keshe komwedi ashike paife ohatu ke li hanga tuli meendjo shaashi eendjambi detu odishona,” ta holola.
Onghee nafye otwa hala okukala tuna omauwa oilonga ngaashi naana ovanailonga aveshe.
“Paife ohatu longo tuna oshinyenyu tuhe na ombili yokomwenyo molwashi oshimaliwa hatu futwa oshishona. Otwa hala ouministeli woilonga u tu popile molwashi ohatu mono oixuna,” ta ti.
Lwopokati opo, omupedu presidente woNEFF Kalimbo Iipumbu noku li oshilyo yeumbo lomutumba wopashiwana okwa lombwela oovena vongeshefa yoRani Group ta ti ina hala okuuda ovanailonga va kufa ombinga mekangha va tewatewa moilonga.
“Ngeenge onda lopotelwa kutya umwe wovanailonga a kufa ombinga mekangha okwa kufwa moilonga ohandi kaka tukila oRani Group onghatu yopaveta,” Iipumbu ta ti.