Kansela woshikandjohoololo shEengodi Protasius Neshuku okwa ti ombelewa yaye oya lopotelwa ounona vahapu vehe na eedjapo domadalo eshi ooina va dala novakwashiwana vaAngola.
Okwa ti ooina younona ve na ooxee vovaAngola inava hala okutula ounona vavo keefani davo shaashi ounona itava dulu okuya kofani yaxe ngeenge ke na sha oufemba waNambia.
Neshuku okwa hokolola ta ti moshikandjohoololo shaye omuhadi nai ovakwashivana vaAngola hava longo momaumbo ngaashi okulifa oimuna nokulima momapya.
“Ovaangola vamwe ova kala mo efimbo lile moshikandjohoololo shEengodi, ovo paife ve li momakwatafano opaihole novakainhu vomoshikandjohoololo shetu eshi ve na ounona navo paife,” Neshuuku ta ti.
Kansela okwa ti naashi ohashi eta opo ounona va kale vehe na eedjapo domadalo shaashi ooxe Ovaangola.
Okwa ti oluhepo mokati kovanyasha olo unene hali eta opo ovanyasha vaye momakwatafano opaihole noOvaangola eshi ovakainhu vahapu hava hekelwa oimaliwa.
Okwa hokolola ta ti ombelewa yokuyandja omaufemba yomoshitukulwa shaShikoto oya kala nokutalela po oshikandjahoololo shaye kombinga yonghalo younona vehe na omaufemba, ashike ovadali ve na eembapila delixwa po ounona vavo ova pewa eedjapo domadalo.
“Ngeenge owa i meefikola dihapu domoshikandjohoololo shetu omu na ounona vahapu vehe na eedjapo domadalo shaashi ooxe Ovaangola,” Neshuku ta ti.
Okwa weda po ta ti moshikandjohoololo shaye omu na yoo vali ovakulunhu vamwe vehe na omaufemba woshilongo omanga vamwe iha va kwata opondjela shaashi kavana sha eembapila da yela edi tadi dulu okuvapefa omaufemba.
Kansela okwa weda po yoo vali ta ti oshikandjohoololo shaye omu na oshiwana tashi dengwa kondjala neenghono eshi ombelewa ha kukala ashike kuna oshiwana tashi kwena ondjala tashi pula omakwafo oikulya kukansela.