Oitaashi itatu yomahooli yoPuma moshitukulwa shOhangwena oya pata sha etwa konghalo kovanhu tava landifa omahooli paumbudi.
Eengeshefa domahooli odo da pata ongaashi oshitaashi shokOmafo, Oshikango, nOndobe moshitukulwa shaHangwena.
Omukulunhu koshikondo shokulwifa oimbuluma moshitukulwa shaHangwena, omupedu Commissioner Bennet Muyambango okwa ti oitaashi ei oya pata shaashi ihai mono vali eetuwa tadi ka nwefa omahooli.
Okwa ti onghalo yokulandifa omahooli paife oya hanya moshitukulwa novanhu paife ova ninga eengeshefa konima yomakuma nomomaumbo avo tava landifa omahooli. Kakele kOvanamibia, ovakwashiwana vaAngola navo onghee tava twikile nokulandifa omahooli kOshikango.
Okwa ti ovanhu vamwe ohava di koitukulwa ya yooloka ile keedoolopa da yooloka tava ka tala omahooli kOshikango nelalakano lokulandifa.
“Ngeenge ova i kOshikango efimbo longula oto hange ko omikweyo deetuwa tadi nwefa omahooli, omanga ovanhu vamwe ohava ka nwefa omahooli moAngola shaashi oku na ombilixa,” ta ti.
Muyambango okwa ti ovanhu kwa li tava longele poitaashi yomahooli ova kanifa oilonga paife molwaashi oitaashi oya pata.
Okwa ti Etivali pefimbo lopolifi tai ningi oshikonga kOshikango oya kwata po ovalumenhu vane konima eshi va hangika nomandini omahooli momaumbo.
Ovashingi veelefa ova lombwela Kundana tava ti omahooli oku na ondilo onghee onghalo ei oya eta opo va kale tava nwefa omahooli kuNgungula.
Endini leelitela 25 oli na N$300 ile N$350 omanga okandini keelitela nhano ke na N$50.
Omulumenhu umwe ha shingi otaksi okwa hokolola ta ti paife oha longo oshimaliwa shihapu mefiku shaashi oha longifa oshimaliwa shishona okunwefa omahooli.
“Ngungula ohatu mu pandula shaashi ote tu kwafele neenghono. Onghee ngeno kapa li Ngungula ngeno otwa mona oixuna,” ta ti.
Omulumenhu ou okwa ti kashi shi ashike ovashingi votaksi hava nwefa omahooli kuNgungula ndele ohaku ka nwefa yoo vali novanashilonga va yooloka unene tuu ovahongifikola.
Omunangeshefa Daniel Shindume a shiivika nawa Supercool noku li mwene woshitaashi shomahooli pOnhuno okwa hokolola ta ti onghalo yaNgungula oya shunifa eengeshefa davo pedu.
Shindume okwa ti oku li popepi nokukala a pata ongeshefa yaye yoshitaashi yomahooli yopOnhuno molwaashi ihaku i vali eetuwa di nwefe omahooli.
“Ovanhu ashike tava landifa omahooli paumbudi tava longo oshimaliwa shihapu omanga fye ihatu longo vali oshimaliwa. Kashi li pauyuuki shaashi fyee ohatu futu oifendela yokongulu omanga ovanhu tava landifa omahooli momaumbo avo ihava futu,” ta ti.
Shindume okwa ti ova li okutuma omanyenyeto avo kouministeli weemina noikwanghono ashike kape na elunduluko.
Okwa yelifa ta ti poshitaashi shomahooli shopOnhuno ope na ovanailonga vahetatu noshoyo omukeleli womaliko ashike otava kanifa oilonga shaashi ongeshefa otai ka pata.
Lwopokati opo, omukainhu umwe a li ha longele koshitaashi shomahooli pOndobe okwa hokolola ta ti kashipu eshi a kanifa oilonga yaye shaashi ota dengwa koluhepo nondjala.
“Paife ondi li ashike meumbo ndihe na oilonga. Ngungula okwe tu etela ondjala noluhepo. Ngeno kapa li Ngungula ngeno osho natango otu li moilonga yetu,” ta hokolola.