Ehangano lyopapangelo lyoNational Planning Commission (NPC) olyili metifa okuninga iigongi oshowo okupulakena omaupyakandhi ga taalela oondoolopa, miitopolwa ayihe 14.
ONPC oyi lile po okutula miilonga iilalakanenwa mbyoka ya talika ko oyo yasimana unene meyambulepo lyoshilongo noya nyolwa membo etihamano lyomalalakano goshilongo lyonational development plan (NDP6), movision 2030 noshowo moshilalakanenwa sheyambulepo lyeliko lyoshilongo.
Oshiwike sha ziko NPC okwali a talele po ondoolopa yOmuthiya moshitopolwa shaShikoto, mekwatelo komeho lyomupevikuluntu Roux Sampati. Ehangano ndyoka olya fatulula kutya ota li ende niitopolwa ayihe opo lyi vule okuuva omaupyakandhi na nkene gena okukandulwa po.
“Omaupyakandhi ngoka ohaga tulwa kumwe opo ga ka kundathanwe noku shangelwa membo lyina sha noNPD 6, opo ku shuwike shoka sha tokolwa po nomalunduluko ga etwa mondoolopa yontumba,’” ya fatulula ngaaka. Ehangano olya totha mo kutya oya kutha olweendo ndoka owina opo ya vule okuuva ashihe koshigwana, noku shi tula momishangwa.
“Okuza mpaka otatu ka lopota ashihe shoka twa ndhindhilike, opo shi vule okukudathanwa noku tokolwa pamuthika gwahugunina opo ku vulwe ku kuthwe omatokolo gomondjila,’’ ya yelitha ngaaka.
Iigongi mbinga ohayi ningwa kehe omumvo, opo ku vulwe okuthanekwa onakuyiwa, yina omahumokomeho oshowo yaana omaupyakandhi.
Ta ti, iigongi mbika natango ohayi kundathana omaupyakadhi taga vulu okuhunitha pevi eliko lyoshilongo oshowo nkene eliko lyoshilongo lyina okuhwahwamekwa. Omimvo dha ziko, okwali yathiki komalelo gopamuthugululwakalo hoka kwali kwa lopotwa omashongo ga yooloka geya taalela. Omugandji gomauyelele melelo lyondoolopa lyOmuthiya Ottilie Shingenge okwa ti, oya li ya totha mo omaudhigu agehe ga taalelwa kondoolopa oshowo kaakalimo yawo, esiku ndyoka. “Elalakano okufatulula omaupyakandhi ngoka elelo lyondoolopa yetu lyaana onkondo okuga kandula po, opo ga vule okukandulwa po kehangano ndyoka lyina oonkondo dha higa ko,” ta fatulula ngaaka.
Ta ti, oya pandula sho aanambelewa aanene yathiki moondoolopa dhawo opo ya mone oompito dhoku totha mo omaupyakandhi ga taalela aakalimo yawo.