Festus Hamalwa
Ehangano loNamibia Wildlife Resorts otali lalakanene okulwifa ondjala meefikola konima eshi la tota po opologalama yokuninga oikunino meefikola. Oshikunino shotete osha totwa kofikola Oshekasheka Combined School oshivike sha dja ko, omo ofikola ya pewa eembuto doimeno ya yooloka noilongifo yokulongifa moshikunino.
Moshipopiwa shaye omupopiliko wo-NWR, Nelson Ashipala okwa ti ehangano lavo otali lalakanene okushakeneka epangelo ondjilakati tashi pitile mokuxwaxwameka ovanafikola
va longe oikulya yavo vene moikunino tai yandjwa ko-NWR.
Ashipala okwa ti oikunino 14 otai ka totwa po keefikola da yooloka moshilongo nokukala ya yambidida eefikola noikwafifo. Okwa yelifa ta ti eefikola ashike edi di na opologalama yokatete tadi ka pewa oikunino opo ovanafikola va kale tava li oikulya ya dja moshikunino shavo.
“Oikunino otai kwafele yoo vali okukelela omhumbwe yoikulya meefikola noshoyo ovanafikola vaha kwatwe komanyutu. Onghee osha fimana opo ovanafikola va kale tava longo noudiinini okukaleka po oikunino yavo,” Ashipala ta ti.
Okwa weda po ta ti oikunino younamapya otai yandje omhito kovanafikola opo va kale tava ningi oinyangadalwa yoshilongwa shavo shounamapya.
“Oikunino otai longo ovanafikola efimano lounamapya. Onghee osha fimana ovanafikola va kale ve na eudeko nghee oikunino younamapya ya fimana moshilongo,” ta ti.
Ashipala okwa weda po yoo vali ta ti NWR ota ka yandja omhito kovanafikola va pita nawa opo va kale tava i koshikunino shoinamwenyo kEtosha National Park ve ke lihonge omaludi oinamwenyo.
Omukulunhufikola pofikola Oshekasheka Combined School, Simon Haitembu okwa pandula unene NWR eshi a tota po oshikunino shounamapya
mofikola yavo.
Haitembu okwa ti ei oyo omhito iwa kovanafikola okukala va longa oikulya yavo vene tai di moshikunino. “Ohatu ka longa nelitulemo okuhambula po oshikunino shetu. Ohatu ka leke po eameno la wana loshikunino shetu,” ta ti.