OHANGWENA - Ofikola yedina Ama Gorases Private School oya fiwa pomutenya konima eshi eengulufikola nhatu da pya po mwa kwatelwa omambo ovanafikola.

Oshiningwanima osha ningwa mexuliloshivike efimbo lokomatango mOhangwena popepi nosekundofikola yaPonhofi.

Ofikola Ama Gorases Private School oi na ondodo yopetameko fiyo onhinhatu.

Omupopiliko wopolifi moshitukulwa shaHangwena Sergeant Andreas Nghiyolwa okwa hokolola ta ti kape na ouyelele kutya omundilo owa etwa koshike onghee ovanhu ova mona ashike eengulufikola da yaka omundilo.

Opolifi oya hokolola tai ti pefimbo ovakwashiwana tava dimi omundilo omulumenhu weedula 22 okwa mona oshiponga komutwe noku li paife a tambulilwa moshipangelwa shaNgela ta mono epango lopaunamiti.

Otaku hokololwa kutya omulumenhu okwa ninga oipute momutwe ashike paife oku li monghalo i li xwepo.

Omukulunhu pofikola opo, Emilia Abraham okwa ti oikwafifo yofikola yovanafikola aishe oya pila meengulufikola omo.

“Paife otwa taalela eshongo lovanafikola vehe na omambo okushanga nokulesha,” ta ti.

Okwa weda po ta ti paife ohava longifa ashike ongulufikola imwe okulongela ovanafikola.

“Elihongo lounona ola iwa moshipala molwaashi ohatu ka longa noudjuu tuhe na eengulufikola da wana noikwafifo,” ta ti.

fhamalwa@nepc.com.na