Omupevi kuluntuwiliki muuministeli wuunamapya omeya nomatalululo gomavi Eliajah Ngurare okwa ti oopomba dhoomboola dhili 20 odha yakwa po momwendhi gumwe kOhangwena.

“Onkalo oya nyayipala, epangelo otali kondjitha okulundulula onkalo yaantu ya taalelwa enota, ihe kombinga yimwe oshigwana otashi hanagula po shoka tashi etwa po okuhupitha oshigwana, shoka kashi li mondjila,” ta nyenyeta ngaaka.

Ta po pi kutya oshigwana moshitopolwa shaHangwena osha tokola okuya po naakeleli mboka taya kala taya takamitha omahala ngoka.

Omupopiliko muuministeli wuunamapya Jona Musheko okwa koleke kutya oopomba ndhoombola 20 odha yakwa moshitopolwa shaHangwena, ihe shoka otashi ningwa natango kiitopolwa yilwe moshilongo.

“Uulunga woopomba dhoomboola owuli pombanda moshilongo, shoka tashi yematitha, oshoka epangelo otali longo nuundhiginini okuyambindhindha oshigwana shili mo mpumbwe yomeya, ihe oopomba  otadhi hanagulwa po,’’ ta nyenyeta ngaaka.

Ta ti, okulandulula oopomba ndhoka ohaku pula epangelo oshimaliwa sha thika N$80 000 inamu kwatelwa iilonga yilwe tayi pula natango oshimaliwa sha thika N$20 000.

Ta ti, iimaliwa oyindji unene tayi zi moshiketha shepangelo ihe itayi longo shoka ya nuninwa.

“Natango katuna uyelele wothaathaa mpoka hapu falwa oopomba ndhoka, ashike ota tu fekele dhina mpa hadhi falwa, omolwa ongushu yadho,” ta gwedha ko ngaaka.

Musheko kwa ti, uuministeli wuunampya otau tsikile okunkondopaleka egameno lyoombola, no kwa kumagidha oshigwana shi kale tashi sile oshimpwiyu noku gamena oopomba dhoomboola.

Omupilimaminista Saara Kuugongelwa-Amadhila sho a li a gandja omboola onene moshitopolwa shaHangwena mehuulilo shiwike okwa kumagidha oshigwana shi longithe omboola ndyoka nawa oshowo okuyisila oshimpwiyu onga yawo yene.

Kuugongelwa-Amadhila okwali a kumagidha ngaaka  sha landula oonkundana dhuulunga woopomba ndhoombola tau indjipala moshilongo.

“Ondina omukumo kutya ombola ndjika ota mu yi sile oshimpwiyu opo mu vule okukala nomeya ga yela oshowo okukala po pepi nomeya,’’ ta popi ngaaka.

Ngoloneya gwoshitopolwa shaHangwena Sebastian Ndeitunga okwa ti, oshitopolwa shawo osha ningwa oshihakanwa shuulunga woopomba dhoombola.

“Oku eta po omboola yimwe ohashi pula oshimaliwa sha thika N$900 000, iimaliwa mbyoka oyindji noonkondo, sho shoka tandi pula oshigwana shi longele kumwe okukeelela oombola ndhoka dhaayonagulwe,’’ ta popi ngaaka.

vkaapanda@nepc.com.na