ONGWEDIVA - Uuministeli wuunamapya, omeya nomakuti owa longitha oshimaliwa okutha oomboola hetatu moshitopolwa shaHangwena okuza petameko lyomumvo nguka sigo onena.
Oomboola ndhoka odha thewa opo dhi vule okugandja omeya kaakwashigwana mboka ya kala ya taalela uupyakadhi womeya oshowo ya kale haya ende iinano iile taya kongo omeya.
Uupyakadhi womeya owa kala tau dhana onkandangala unene moshitopolwa shaHangwena, hoka kwa kala ku na omwaalu gwaantu oyendji taya nu omeya ga nigila, taga zi momithima.
Omu g an dj i g omau y e l e l e muuministeli wuunamapya Jona Musheko okwa ti, oye li metifa okutha oomboola miitopolwa ya yooloka moshilongo.
Ta ti mOhangwena oya tha mo oomboola oompe momikunda Omupini, Oikuku, Ombulu, Ohamukwata, Eeshowa, Omupanda Okwalondo, Ombuwayomuhongo,Epasha oshowo Ohamukwata.
Okwa popi ta ti, natango oye li metifa okutha oomboola koshitopolwa shaKavango gokuuzilo oshowo gokuuninginino.
‘’Ooproyeka ndhika odha tulwa miilonga okukandulapo omaupyakadhi gomeya ga taalela oshigwana moshilongo ashihe,” ta ti ngaaka.
Musheko okwa popi ta ti, omwedhi tagu ya otaya ka pititha uuyelele awuhe wi ihwa po kombinga yoomboola
ndhoka dha pwa okulongwa moshilongo.
Matias Shoombe gwomomukunda Ohamikoka okwa popi kutya enota olya kala omukundu omunene kaakwashigwana yomOhangwena omanga oshilongo inashi manguluka, ihe konima yoomvula adhihe ndhoka oshilongo sha manguluka natango enota oli li omukundu gwa nyengana okukandulwa po.
“Ondi uvite nawa sho epangelo lya dhimbulula uupyakadhi mbuka, oshoka inashi kala oshipu nando. Omeya oga kala ashike taga tulwa miikandjo yimwe unene mbyoka yi na aanenentu. Otwa hala oshilongo ashihe shi kale tashi longitha omeya ga yela, okukwatelapo uundjolowele waantu ayehe,” ta popi ngaaka. Ta ti oyendji oya kala nokweenda iinano iile taya ka konga omeya ga yogoka. Maria Simon gwokomukunda Ondwi okwa ti, ohaya teke omeya momithima.
Okwa popi kutya onkalo ndjoka oya nika oshiponga noonkondo notayi tula moshiponga uundjolowele waakwashigwana.
Ta gwedha po ta ti, epangelo nali tsikile okulonga shoka lya longele omikunda ndhoka dha mona nale omeya opo ku yandwe omikithi oshowo omaso taga zilile melongitho lyomeya ngoka inaga yogoka.
Kansela gwoshikandjohogololo Epembe mOhangwena, Philip Shikongo omimvo dha piti okwa li a holola omalimbililo ge omolwaakwashigwana taya longitha omeya inaga yogoka moshitopolwa.
Okwa li a ningi omayindilo gootenga dhomeya dhi li po 35 dha pumbiwa moshikandjohogololo Epembe mOhaimbudu, Oukala, Ohamenya, Omupanda, Oluungu, Oneisiyo, Ohamikoka, Onduuludiaya, Ohamutwedautende, Okuyana oshowo Omupalala; hamano odha pumbiwa mOkongo momikunda ngaashi Olukumwa, Okanghalulwena, Omulamba, Oshikuni, Ondiimwenena oshowo Olupale; 12 odha pumbiwa mOmundaungilo momikunda ngaashi Ekolola, Oshihepo, Epinga, Eewa, Ohehongo, Onainghete, Oshipala, Ondwi, Ombaaloka, Omufitu-wekuta oshowo Oshingadu; omanga kwa pumbiwa oomboola hamano mOshikunde momikunda ngaashi Okwat iwalunga, Owalyainda , Onamihonga west, Omunyangwhwe, Okambuwa oshowo Ombaba.
Mo2018, Ngoloneya gwaHangwena kwali pethimbo ndoka, Usko Nghaamwa, okwali alongitha oomboola hetatu dhomoombola ndhoka, opo a vule okugandja omeya kaakwashigwana moshitopolwa she mboka haya ende iinano iile taya kongo omeya.
Oshitopolwa shaHangwena oshi na oonzo dhomeya dhomevi, ndhoka tadhi vulu okugandja omeya kaakwashigwana uule woomvula dha thika o 400, omanga aakwashigwana yomoshitopolwa shoka ya taalela enota enene.
vkaapanda@nepc.com.na