Festus Hamalwa

Okakadona keedula 16 ke na oudu wopamadiladilo vati oka kwatwa onghonga kovalumenhu vambulavo vavali ovakwashiwana Ovaangola hava longo meumbo omo.

Oshiningwanima eshi osha ningwa omudo wa dja ko muDesemba meumbo lavo momukunda Onethika moshitukulwa shaShikoto. Omupopiliko wopolifi moshitukulwa shaShikoto Inspector Ellen Nehale okwa hokolola ta ti ovafekelwa ova kala nokukwata okakadona aka onghonga oikando ya yooloka.

Vati ovafekelwa ova ningila oshihakanwa shavo omatilifo opo  shiha lombwele omunhu nande oumwe.

Opolifi oya hokolola tai ti okaana aka oka kala alushe nokulopotela xe ashike vati xe okwa kala ha ka longelwa omunyonena wopaixulo kovafekelwa ashike xe okwa kala ta diladila kutya omona ota ningi omashendjo.

Okudja opo vati okwa ka ningila omalapulapulo ovafekelwa nokonima omufekelwa umwe okwa popya oshili kutya ova kwata okaana onghonga.

Ovafekelwa inava kwatwa po natango molwaashi opolifi oye lipyakidila nokuninga omakonakono e lixwa po. Oshiningwanima shikwao, okaana keedula 11 vati oka kwatwa onghonga komulumenhu weedula 32 momukunda Okandjeke moshitukulwa shaShikoto.

Opolifi oya hokolola tai ti okaana okwa li taka ende moixwa ka uka keumbo nokonima yefimbo oka shakaneka omufekelwa moixwa.

Vati omufekelwa okwa lombwela okaana opo va ka nangale nako keumbo lavo molwaashi okwa toka nokuenda oufiku. Opolifi oya hokolola tai ti okudja opo okaana oka dimina ndele tava i nako keumbo lavo nokonima omufekelwa okwa lombwela okaana ka ka nangale monduda nounona vambulavo.

Otaku hokololwa kutya omufekelwa ou konduda yaye okwe livaka ko ndele ta i monduda omu kwa li mwa nangala okaana oko noku ka kwata onghonga.  Omufekelwa naye omukwashiwana Omuangola, nokwa kwatwa po. 

- fhamalwa@nepc.com.na