OSHAKATI - Olutu lwokakadhona komimvo 14 olwa adhika moombuli dhondunda yoomwiidhi kuyina lwa endjelela, lu na okakayiwa mothingo.
Sha ikolelela komupevikuluntu gwopolisi moshitopolwa shaMusati Moses Simaho, oshiningwanima osha holoka Etitatu momukunda Otjaandjamwenyo moshikandjohogololo shaRuacana.
Otaku hokololwa kutya okakadhona hoka oka li ka thigwa megumbo oko akeke kuyina, ethimbo lyongula omanga taka ilongekidha okuya kosikola.
Sho anuwa yina a galuka, okwa li i itsu molutu lwomonakadhona lwa endjelela, mondunda ndjoka a li ha lala.
Okakadhona hoka anuwa inaka thiga ka shanga shoka sha etitha opo ki imangeleke.
Otaku hokololwa kutya nanatango kakwa li ka ndhindhilikwa ke na uupyakadhi, nomayihumbato gako kaga li taga limbililike.
Okakadhona oka tseyika nedhina Muhume Johannes.
Monamibia, osho wo kiilongo yilwe muuyuni, otaku fatululwa kutya eyikutho lyoomwenyo oshinima hashi etithwa komaupyakadhi gonkalamwenyo ga yoolokathana.
Poompito dhimwe omuntu iha ulike omandhilindhiliko gwokwiikutha omwenyo, ohashi ka monika ashike omuntu sho a sa nale, yamwe ohaya thigi po uumbaapila moka ya nyola omatompelo kutya omolwashike yi idhipaga, omanga yamwe taya thigile aapambele yawo naapopepi nayo omalimbililo kutya omolwashike ye shi ningile.
Opolisi oya kumagidha oshigwana aluhe shi kale tashi kongo aahungimwenyo uuna sha iyadha muupyakandhi wontumba okukeelela omaso goludhi ndoka.
Moshiningwanima shimwe inaashi faathana, omukiintu gwomimvo 29 anuwa okwa kwatwa koonkondo kaalumetu yaali pethimbo a li ta zi kuundingosho.
Simaho okwa ti, oshiningwanima shoka anuwa osha holoka potundi 20h00 molukanda Ombeetele momudhingoloko Ogongo.
Otaku hokololwa kutya omukiintu ngoka okwa li ta ende ta zi kookamba a uka kegumbo sho a li a ponokelwa kaalumentu yaali, mboka ye mu zilile konima.
Ta ti, anuwa okwa li ye mu hula koonkondo, noku mu kwata koonkondo, taya ningi omalufo.
Aalumentu mboka anuwa oye shiwike, nopolisi oyi li metifa oku ke ya manga po.
Natango opolisi moshitopolwa shaMusati oyi li molukongo lwomulumentu ngoka e shiwike, sho a kwata okakadhona komimvo 16 koonkondo.
Omupevikuluntu gwopolisi moshitopolwa shaMusati Moses Simaho okwa ti oshiningwanima shoka osha ningwa moshiwike muka momukunda Ohauhwe momundhingoloko gOutapi.
Otaku hokololwa kutya omulumentu ngoka okwa li a nu po ondjumbu okakadhona hoka noku ka longela omiyonena ndhoka.
Moomwendhi dha piti omwa lopotwa aanona yomimvo 9, 13, 14 oshowo omukuluntu gumwe, ya kwatwa koonkondo.
vkaapanda@nepc.com.na