Uuministeli wuuhaku nonkalonawa owa pititha omushangwa, tau ti; okakilinika Tondoro moshitopolwa shaKavango gokuuzilo oka udha omeya, omolwomuloka omunene ngoka gwa loko.
Mehuliloshiwike oonkulungu mokutala onkalo yombepo moshilongo oya tseyithile oshigwana kutya oshiwike shika iitopolwa ngaashi Zambezi, Kavango gokuuzilo oshowo gokuuninginino, otayi ka mona omuloka omunene, nompito yefundja onene.
Omukuluntuwikliki muuministeli wuuhaku Ben Nangombe okwa popi kutya okakilinika hoka oka li ku udha omeya meni, okuza pehala lyokutegelela, pehala lyomayakulilo, momapungulilo gomiti oshowo mongulu yokumonena uunona.
“Sho twa li twa ningi omapekapeko, omeya ngoka okwa li ga kunguluka okuza kooha dhondjila hoka kwa li itaaga vulu okupita oshoka uukanka womeya owa thita,” ta fatulula ngaaka.
Ta ti, uuministeli wuuhaku opamwe nehangano lyokulonga oondjila olyi li metifa okulonga ehala lyokakilinika opo monakuyiwa omeya ngoka kagaa galukile po we pehala mpoka.
Nangombe okwa yelitha kutya nonando iikwathithi yimwe yoshipangelo ya mono omeya, inayi yonuka unene.
“Inatu lopotelwa ekanitho lyomwenyo nenge emono lyoshiponga,” ta gwedha po ngaaka.
Ayihe mbyoka ya li ya kuthwa mo molwomeya, oya shunwa mo mokakilinika, naambyoka ya nyenge omeya otayi longwa.
Okwa ndhindhilikwa omilonga dhomeya Zambezi, Kunene oshowo Orange, omeya gawo gu uka pombanda, onkene aakalimo haya zi pomahala ge li popepi otaya kumagidhwa ya kale uupathi.
Ehangano lyonkalo yombepo Etitatu olya pititha uuyelele kutya omulonga gwaZambezi oshowo ogwa yalulwa nomeya ge thike poometa 1,36 ongula yEtitatu, omanga gEtiyali ga li poometa 1,33.
Omanga omulonga gwOkavango gwa yalulwa oometa 5.22 Etitatu, okuyelekanitha nEtiyali, sho ga li poometa 5.15.
“Omeya gomilonga ndhoka oge li pombanda okuyelekanitha nomumvo gwa zi ko,’’ ya yelitha ngaaka.
Omulonga gwaKunene, koRuacana ogwa yalulwa tagu tondoka po337.60 m3/s, hoka ku thike iikando iyali okuyeleka nomumvo gwa yi.
Oya kumagidha aaleli yiitopolwa ya kumagidhe mboka haya zi popepi nomilonga opo ya kale ya ilongekidhila kehe shoka tashi holoka, yo ya kuthe omatokolo ngoka taya vulu okuyanda yaa ninge iihakanwa.
“Oondama dhomeya kiitopolwa yokuumbugantu inadhi udha lela omeya. Odha thikama po22.6% oshowo 66.3% okuyelekanitha nomumvo gwa yi sho dha li 39.3% oshowo 80.0% omumvo gwayi,” ya pititha ngaaka.
vkaapanda@nepc.com.na