ONGWEDIVA - Opolisi moshitopolwa shaShikoto oya kumagidha aakuluntu ya hulithe po okuthiga aanona miikaha yakehe momagumbo, omolwiiningwanima yi nyanyaleka tayi ningilwa aanona kaanegumbo naapopepi yawo.

Omukuluntu gwopolisi Teopolina Kalompo-Nashikaku okwa li a popi ngaaka, sho opolisi ya manga po okamati komimvo 16, hoka ka tsu okanona komimvo heyali puukiintu noku ka longela iihuna ya gwedhwa po yopaihulo.

Oshiningwanima shoka anuwa osha holoka mEtitano koExtension 6, koTsumeb, lwopotundi 21h00.

Omufekelwa omumwayinagona gwokanona hoka.

Moshiningwanima sha faathana, omulumentu gwomimvo 29 okwa mangwa po natango kopolisi moshitopolwa shaKavango West sho anuwa a kwata okakadhona komimvo 16 koonkondo.

Otaku hokololwa kutya oshiningwanima shoka osha holoka momukunda Mururani Olyomakaya ga zi ko.

Opolisi oya ti, omulumentu ngoka okwa li a ponokele okakadhona hoka e te ka hata po, te ka pondo noku ka kwatwa koonkondo.

Omuhingimwenyo muuministeli wuundjolowele nonkalonawa Josephine Apoopawa Kapweya okwa popile ta ti, omalongo kombinga yomakwatokoonkondo oga pumbwa okunkondopalekwa. 

“Aapolisi oshowo omahangano ga yooloka oga pumbwa okumanga uukumwe kumwe okulwitha omakwato koonkondo kaaga holoke momindhingoloko ndhawo,” ta ti ngaaka.

 Ta gwedha po kutya onkalo ndjoka oya nyayikila, uuna gumwe a kwatwa koonkondo onkalo yomuntu ohayi lunduluka, ihayi kala we ya nale.

 Ta ti, oshilalo shoka uuna sha holoka momuntu ihashi polo.

 Omakwato koonkondo oga pimbila noonkondo, kehe esiku opolisi otayi lopota omakwatokoonkongo taga ningilwa aantu okuza kaanona sigo aakuluntu. 

Mehuliloshiwike omukiintu gomimvo 28 okwa li a yugwa iinima ye, e ta kwatwa koonkondo. 

Shoka osha holoka koWindhoek moshitopolwa shaKhomas.

 vkaapanda@nepc.com.na