Konima yoomvula 23 nokonima sho a li a  a mana eilongo lye sho a dhueulilwa uuhahende, Kinyera okwe shi pondola okusindana oshipotha shahe mompangu. Ompangu yopombanda yokutalulula iipotha moUganda osho ya gandja etokolo lyi li muuwanawa wahe oshiwike shike, shoka sha eta pehulilo oshipotha shika sha kwata uule woomvula dha pita 20. Ashike kuKinyera osha li esindano lyontoyendulu.
“Onda li nda nyakukwa sho okulonga kwandje nuudhiginini oomvula adhihe ndhoka kwa li kwa hepuluka naashoka tate a mona evi lye ishewe,” Kinyera ta lombwele oCNN okupitila moemail. “Kombinga yimwe osha li tashi uvitha nayi sho ndi shi kutya ke na we naanaa shoka ta vulu okulonga shoka a li a dhilaadhila oshoka ngashiingeyi oku na omimvo 82.
Sho Kinyera a li omputu, he okwa kala ha nyenyeta aantu ya hala oku mu yuga evi lye moshitopolwa shaKitgum muumbangalantu waUganda.
“Shoka osha thiga ndje nomutima gwa lindimana,” ta ti ngaaka. “Okwa li a ninga eindilo lyevi nokwa li a pewa oombapila dhuuthemba ashike ka li ta vulu okulonga sha omolwa omananathano ngoka ga kala po. 
“Onkene onda li nda tokola ndi ninge ohahende, opo ndi vule okukwathela aantu uuna ya adhika komaudhigu ngangaka.”
A li omuniilonga gwepangelo ngoka e li ngashiingeyi moshipundi shevululuko, he yaKinyera okwa kala ha zi mpoka uule wethimbo okuza kuunona osho wo sho a ningi omukuluntu. “Okwa kala e na ekwatathano ewanawa nehala ndyoka, mwa kwatelwa mumwayina, ngoka nda lukilwa,” ohahende ndjika tayi gwedha ko ngaaka. Okwa kanitha evi lye mo1996, sho a li a falwa kompangu kaashinda omolwa omahilathano ngaka gevi. Iipotha oyindji oya li ya tulwa mo uule woomvula ndhoka, moka shimwe sha ninga uule woomvula dhi vule pomulongo. “Iimaliwa ayihe mbyoka e na oya yi miifuta yoveta.” “Tate okwa li a tulilwa po oondjindikila kaa longe nando osha mevi ndyoka.” Kinyera ta gwedha po ngaaka.
Oomvula ndhoka odhindji okukala mompangu odha thiga omulumentu nguka dhe mu uguna. “Oshe mu dhenga ombunda pevi. Okonyala a ye oonkwengu. Omathimbo gamwe okwa li ha vulu okulila. Nuundjolowele we owa li wa nkundipala noonkondo omolwa okalo ndjika.”
Onkalo ndjoka oya li ya thiminike Kinyera a ilongele uuhahende moka a pyokoka miinima yomavi. Okukondjela omavi oshinima sha ha moUganda nomathimbo ohashi vulu oku eta iikolokosha.
“Onda itula mo momapekaapeko gomuule noonkondo nonda hala okukala ndi na euveko lyomuule kombinga yoshipotha shatate nokukambadhala oku shi potokonona,” Ta ti ngaaka.
“Oshipotha osha li oshileka noonkondo shili sho otashi pula omadhiilaadhilo oshoka kompangu yomatalululo nena kape na we shoka tashi vulu oku ka ningwa po.Ngeno onda ndopa noonkondo.
Kinyera ta ti he kwa li ta vulu okuya kompangulilo ashike okwa li a nyanyukwa noonkondo konkundana ndjoka.