Okanona koomwendhi ndatu oka si sho ka anuwa ka tsuwagulwa noombele komulumentu gwomimvo 27, a li nale mekwatathano lyopahole nayina.

Omukuluntu gwopolisi moshitopolwa shaShikoto Teopoline Kalompo-Nashikaku okwa ti, oshiningwanima shoka osha holoka mehuulilo shiwike, momukunda Ontunda momudhingoloko Onyaanya.

Otaku hokololwa kutya omulumentu ngoka anuwa okwa li a thindikile omukiintu ngoka kwa li gwe nale, sho kwali ta ende uuka kaandja yahe yokanona hoka.

Kalompo-Nashikaku okwa hokolola kutya manga taya ende, omukiintu nguka nomulumentu oya tameke taya nyenyeta.

Anuwa omulumentu ngoka okwali a tameke oondjuma ndhoka oshoka ka kwali uuvite ombili sho omukiintu ngoka anuwa a ningi gwomulumentu ngoka oye he yokanona hoka. Omulumentu ngoka anuwa okwa li a tameke okulwitha omukiintu ngoka nokutsa omona noombele.

Okanona okali kasi ethimbo olyo tuu ndyoka, omanga yina ali ayi koshipangelo hoka eli ta mono uuhaku.

Omulumentu ngoka okwa mangwa po kopolisi. Moshiningwanima shimwe shedhipago, omulumentu gwomimvo 29 okwa mangwa po kopolisi moshitopolwa shaShikoto sho anuwa a tsu noombele hekulu omumwayina gwayina gwomimvo 49.

Otaku hololwa kutya oshiningwanima shoka anuwa osha holoka momukunda Oshaatona momudhingoloko Oshigambo, mehuulilo shiwike.

Omulumentu ngoka anuwa okwali a pula hekulu ngoka kombinga yuusita wiikombo ye mbyoka ali a pewa kuyina, noyali ya tulwa metonatelo lyahekulu omanga omulumentu ta koko. Shoka anuwa okwali sha eta oontamanana oonene pokati komuntu nomutekulu. Oya tameke oku lwa, sigo omulumentu ngoka ta tsu hekulu nombele.

Okwali a falwa koshipangelo mbala, ashike ina kala ko ethimbo, okwa hulitha.

Nakufekelwa okwa holoka komeho yomapangu yaMangestrata mOndangwa, moka a tindilwa eifutilemo.

– vkaapanda@nepc.com.na