Aahingi yoombetsa mOshakati otaya nyenyeta kutya okulondekela pehala limwe ayehe, nonando inaya uka kiitopolwa yimwe, otashi ya kanitha.
Omuhingi gwoombetsa okuza mOshakati okuya kOmbaye Tiliindje Shimweneni okwa ti etokolo lyokutya oombetsa adhihe nadhi ninge hadhi londokele pomatala gaShakati, inaye shi nyanyukilwa.
“Komatala oku na, oombetsa dha thika po70, dhi li momusholondondo, ihe ndjoka yu udha tango oyo tayi yi, nena otatu ka londeka tu shinge pongapi nuunake? Shoka kasha li mondjila,” ta nyenyeta ngaaka.
Ta ti, ethimbo limwe ohaya kala ye na ookasitoma dhawo ndhoka hadhi ya dhengele, nena ngele ombetsa yandje hayo yi li komeho, ookasitoma dhandje otandi ka thiminikwa ndi dhi gandje po.
Shimweneni ta ti shoka otashi ya shunitha monima oshoka otaya kala omasiku ogendji pevi inaaya longa.
“Tse out na oongunga dhaantu hatu dhi futu komwedhi. Oshimaliwa otashi zi peni ngele itatu longo? Okukala momukweyo, itatu vulu okukwiindhindhimikila nando,” ta popi ngaaka.
Omushingi gwombetsa okuya kOvenduka Shaanika Shilongo okwa ti ohashi kala oshiwanawa okupula omadhilaadhilo nomagwedhelopo oshowo uupyakadhi tau vulu okuholoka konima yetokolo, kwaamboka haya longo nasho omanga etokolo lyahugunina inaali ningwa.
“Ngeno okwa li ye tu pula tango kutya okulundulula ehala lyoombetsa okuya kehala limwe otashi eta uuwanwa nenge uuwinayi wuni, oshoka otse hatu longo nasho kehe esiku , tse tu vule okugandja omayele getu, opo etokola lyahugunina lyi ningwe,” ta popi ngaaka.
Omuhingi gumwe e shiwike kuKundana okwa ti, kaye na uupyakadhi wokufuta okapale, ihe inaya hala pu kale omukweyo gokulondeka ombetsa ndjoka yi li komeho.
“Ngele oya hala tu londekele pomatala, natu londoke ashike ngaashi twa kala tatu londeke pOkatana Service nopoCheckers. Omukweyo otagu tu kanitha noonkondo,” ta ti ngaaka.
Ta gwedha po ta ti, oyi igilila okuhinga kehe esiku, onkene shoka otashi ke ya thiminika ya kale haya hingi omasiku gamwe konima. Ta ti oshinima oshikwawo ookasitoma kadhi hole ko komatala.
“Shoka otashi ka matukitha po ookasitoma dhetu dhi kale hadhi ka londela kOndangwa,” ta nyenyeta ngaaka.
Ta ti oshikando shahugunina ya li ya falwa komatala hoka, okwa li haya futu N$100 kehe mokambetsa okashona sho taka yi, omanga N$150 mombetsa ya landula ko.
Omupopiliko gwelelo lyondoolopa yaShakati Katarina Kamari okwa ti kehe ondoolopa oyi na oompango nomalandulathano ge na okulandulwa.
“Elelo lyondoolopa inali tokola ayihe mbyoka ya zi nokutumbulwa , shoka okwa li sha tokolwa kooyene yoombetsa. Mboka taya nyenyeta unene aahili yoondjato pomahala mpoka,” ta fatulula ngaaka.
Ta popi kutya yo itaya ka landula shoka tashi popiwa kaahili yondjato, otaya landula shoka sha tokolwa kooyene yoombetsa.
Ta ti okwa li kwa ningwa oshigongi momasiku 29 gaNovomba, ihe ooyene yombetsa kakwa li ya totha mo omaudhigu goludhi ndoka.
“Elelo lyondoolopa olya gandja ashike ehala mpoka pe na okulondekelwa, ihe inaya tokola sha. Natango ooyene yomahala mpoka hapu londekelwa oya kala nokunyenyta kutya pomahala gawo otapu nyatekwa,” ta hokolola ngaaka.
Kamari ta ti pomahala mpoka natango kape na omeya po kape na uundjugo, oshinima shoka inashi nyanyukilwa kooyene yonmahala.