Konima sho onkundana ya li ya pitithwa kutya oshigwana otashi vulu okushangitha uukalata wa-MTC komalungula, oyendi oya kambadhala oku shi ninga, ihe inaya pondola sha.

Omugandji gomauyelele mehangano ndyoka lyokukwatakanitha omawi mombepo Erasmus Nekundi okwa ti oshigwana nashi tegelele ko ashike omasiku omashona, opo okwiishangitha kopautekinika ku ye miilonga.

‘’Ope na ashike okaima okashona hoka twa ipyakidhila nako ngashiingeyi, ihe otu li poku ka pondola. Otatu ka tseyithila oshigwana, nkene shi na okushangitha uukalata wawo,’’ ta fatulula ngaaka.

Nekundi okwa ti oye ya po nomukalo ngoka gu li po paife, ashike oya ndhindhilike kutya natango aantu oyendji inaya shangitha uukalata wawo, nomasiku gahugunina oge li popepi.

Ta ti, oshigwana osha kala nokunyenyeta omikweyo omileeleka moka aantu haya kala ethimbo omanga ye na iinakungwanitha yilwe.

Omunambelewa mehangano lyo-MTC Tim Ekandjo ota ti, ota indile oshigwana opo shi longithe ethimbo ndika, okunyolitha uukalata wawo opo kehe gumwe a kale e na okakalata ke na omaukwatya ge.

Ta ti, okwa tengenekwa ookasitoma dhehangano lyo-MTC dhi vule poomilliona mbali dhi kale dha ishangitha.

“Otwa longekidha ethimbo ndika tango lyi longithwe omanga ndyoka tali ka dhengela inaali thikana kehulilo lyomwedhi nguka,” ta popi ngaaka.

Ekandjo ta ti, omayishangitho natango oge li momahala ga-MTC oshilongo ashihe, miitopolwa ayihe 14. Omayishangitho ngoka otaga ningwa oshali itaapa pulwa nando ondando yoshimaliwa. 

“Kehe ngoka taka thika, na kale a faalela ongodhi ye yopeke, osho wo okamutse koshilongo,” ta ti ngaaka.

-vkaapanda@nepc.com.na