Okamati komimvo 16 oka mangwa po sho ka tsu kuume kako ngoka a ka sila koshipangelo.

Omupehakuluntu gwopolisi moshitopolwa shaMusati Moses Simaho okwa ti oshiningwanima shoka osha holoka momukunda Onawa potundi 19h00 mEtiyali.

Otaku hokololwa kutya ookuume mbaka oya li ye li pamwe sho kwa li ya tameke okunyenyeta.

Opolisi oya hokolola kutya nakufekelwa okwa li a kutha ombele nokutsa kuume ke, opolisi oyi li metifa okukonakona shoka sha etitha enyenyeto pokati kookuume mboka.

Nakusa okwa tseyika nedhina Thomas Johannes gwomimvo 19.

Oshiningwanima shoka osha holoka ashike omasiku omashona sho omukulupe gwomimvo 73 a tsu natango kuume ke, ngoka ya li taya nu pamwe naye.

Oshiningwanima shoka osha holoka momukunda Omuhenye mOmandaaha.

Otaku hokololwa kutya aalumentu mboka kwa li ya uhala pamwe, taya nu pamwe.

Omukulupe ngoka ngashiingeyi e li miipandeko yopolisi anuwa okwa li a pweya mo ombele omanga ye li metifa lyenyanyu nokutsa kuume ke.

Nakusa anuwa okwa li a si ethimbo olyo tuu ndyoka.

 Okwa tseyika nedhina Thobias Shetunyenga.

Natango omunamimvo 51 okwa li a si sho a li a dhengwa nondhimbo kukuume ke komutse momukunda Onaame moshitopolwa shaMusati.

Sha ikolela kuuyelele wa gandjwa kuSimaho, oshiningwanima shoka osha holoka oomwedhi  dha zi ko momudhingoloko Anamulenge. 

Otaku hokololwa kutya aalumentu mboka okwa li ya nyenyeta pethimbo kwa li taya zi kookamba yu uka komagumbo. 

Oya li ya tameke okukondja, sho nakutamanekelwa edhipago ndika a li a kutha ondhimbo e ta dhenge nakusa mekothi,” ta hokolola ngaka. 

Ta ti, nakudhengwa okwa li a falwa koshipangelo mbala, hoka a li a ka hulithila oshiwike sha zi ko.

Natango kape na uuyelele wothaathaa kutya aalumentu mboka okwa li taya nyenyeta kombinga yashike. 

Omulumentu ngoka ta tamaneklwa edhipago oku na omimvo 48 a yambukile momukunda Onawa moshitopolwa shaMusati.

Opolisi oya kumagidha oshigwana shi hulithe po okwiilongela omiyonena uuna tashi nyenyeta.

“Hulitheni po okwiikuthila ooveta momake geni yene, ithaneni opolisi opo yi vule okukandula po uupyakadhi wu li pokati keni,” ta kumagidha oshigwana.

Ta ti, okudhengathana ihaku kwathele, ihe ohaku tula ashike gumwe muupyakadhi nenge gumwe a kanithe omwenyo gwe.

Shikongo ta ti, oshigwana nashi kale shi na aluhe oonomola dhopolisi, opo ya lopote iiningwanima yoludhi ndoka, ko ku yandwe omaso inaaga tegelelwa. 

vkaapanda@nepc.com.na