Victoria Kaapanda
ONGWEDIVA-Oshitopolwa shaKavango osha ndhindhilikwa osho shi na omwaalu gu li pombanda moluhepo naakwashigwana ye thike poopelesenda 55,2, omanga oshitopolwa shErongo osho oshihwepo shi vulithe iitopolwa ayihe naakwashigwana ye thike poopelesenda 7,1 oyo ayeke ye li moluhepo.
Ndhoka odha popiwa kuMinista gUuhwaku nonkalonawa Kalumbi Shangula Etitano lya zi ko sho kwa li taku dhimbulukwa esiku lyoomeme moshilongo, mOshitopolwa shaShikoto.
“Epangelo olya kambadhala okuyamukula nkene li na okulwitha ondjala moshilongo, ngaashi naana lya li lya eta po oopolohalama ndhoka hadhi kwathele aakwanaluhepo, aakulupe, aanuulema nosho tuu. “ Shangula ta ti ngaaka.
Ta gwedha po ta ti sha ikolela kendiki ndyoka hali tambula iiyemo oshowo ndyoka hali gandja omwaalu moshilongo, oomeme oyendji oyo ooyene mokukwatelakomeho omagumbo, unene koshitopolwa shaMusati, ye thike poopelesenda 58,3, oshowo Ohangwena 57,5, Oshana 52,4, Zambezi, 50,8 nahugunina Oshikoto noopelesenda 50,8.
Shangula ta ti oomeme natango oya taalela omashongo ogendji nge tashi ya kiilonga opo ya ete po oshimaliwa, ngaashi iilonga yuunamapya oshowo okupewa omikuli.
Ngoloneya gwoshitopolwa shaShikoto Henock Kankoshi momushangwa gwe gwesiku okwa ti atuhe otwa lulilwa kehepeko lyoomeme moshilongo, unene mOshitopolwa shetu, unene omakwatonkonga, omadhipagathano, omayikutho gomwenyo osho wo emonitho lyiihuna.
“Onda inekela kutya ehulithopo lyiinima ayihe mbyoka iiwinayi ongele tatu tamekeni komidhi lela ndhoka hadhi etitha iimbuluma mbyoka.Natu tamekeni okulonga aanona yetu omanga aashona nkene ye na okusimanekathana na nkene ye na okukala namewne omanga aashona lela”. Kankoshi tati ngaaka.
Omunambelewa omukuluntu mombelewa Yiigwanayahangana moNamibia, Rachel Odede okwa popi esiku ndyoka lyedhimbuloko lyooMeme moshilongo ta ti okupitila mehangano tali ithanwa (UNPAF) 2019-2023, UN oku na okukala e na oshinakugwanitha shokuyambidhidha epangelo, opo oomeme ya kale ye na uuthemba nuuthikepamwe ngele tashi ya kokumona iilonga, uwaku, elongo oshowo omahepeko.