Omadhipago nomahepeko gomomagumbo otaga tilitha oshigwana sho aakiintu ye li yatatu ya dhipagwa momasiku ashike gane. 

Linea Silvanus omuhungimwenyo mOshakati sho a yi moonkundathana noshifokundaneki shika okwa  fatulula nokugandja omatompelo oshowo iiyetithi yiiningwanima mbyoka.

Silvanus tango okwa totha mo elongitho nayi lyiikolitha.

Ta ti, omahepeko okupitila miikolitha ohaga vulu okuholoka pamikalo dha yooloka.

“Ope na aantu mboka haya longo omiyonena konima ya nu iikolotha oshowo iingangamithi oshoka kaye shi shoka taya ningi, ano itaaya vulu okuyoolola ngele shoka ta ningi oshi li mondjila nenge osha puka oshoka omadhilaadhilo okwe ga piyaganeka niikolitha nenge niingangamithi. Onda koneke natango kutya oluhepo nalo otalu dhana onkandangala momahepeko. Unene ngele megumbo kamu na iiyemo ya gwana, ohashi eta omalungwenye, okunyenyeta sigo sha eta omadhengathano, ngoka haga holoka momikalo dha yooloka mwa kwatelwa okudhipagathana oshowo okumonithathana iiponga,” ta fatulula ngaaka.

Ta ti, uukodhi nawo ohau  e ta omaupyakadhi goludhi ndoka, omolwaeinekolo lya weya po kati kaaholathani. “Oyendji oya taalela omahepeko ga yooloka momagumbo, ihe oya mbandamekwa kaaya pitithe mo omauyelele ngoka. Opolisi ohayi longele kumwe naahungimwenyo, mboka oyo ye na ontseyo nkene nakuninga oshihakanwa e na okweeta uuyelele awuhe,” ta fatulula ngaaka.

“Okulopota kuyele natango ohaku vulu okukwathela opolisi oshowo aahungimwenyo ya idhope mo, yo ya vule okukwathela mpoka taya vulu, ihe ayihe iiwinayi tayi kala inaayi holoka,’’ ta popi ngaka. Sivanus okwa popi ngaaka konima omukiintu gwomimvo 40, omupangi moshipangelo shaGrootfontein a ningi omutitatu a dhipagwa muule ashike womasiku omashona, sho anuwa a tsuwa noombele komusamane gwe gwomimvo 48, sha ningwa mEtiyali lyoshiwike shika.

Omupopiliko omukuluntu gwopolisi moshitopolwa Otjozondjupa Maureen Mbeha okwa ti oshiningwanima shoka osha holoka lwopotundi 23h00, megumbo lyawo koExtension 5 koGrootfontein.

Otaku hokololwa kutya aaholike mboka ye na okanona okashona oyu uvika taya nyenyeta, noonkugo odha li dhu uvika kaashinda mboka yali ya dhengele opolisi.

Opolisi ya thiki poshiningwanima anuwa oya li ya adha olutu lwomukiintu ngoka  gwedhina Lizelda  Xoagus pevi, omanga omulumentu ngoka a tseyikila iilonga yokutula mo oo-Dstv a adhika ta kondjo nomwenyo sho anuwa a nu uuzigo wontumba.  Omulumentu ngoka okwa falwa a ka mone uuhaku, ihe okwa tseyithwa kutya oku li monkalo ombwiinayi.

Otaku hokololwa kutya aaholike mboka oya kala ye na ohole tayi tengauka uule wethimbo. Opolisi oya patulila omulumentu ngoka oshipotha. Oshiningwanima shimwe osha holoka Omaandaha goshiwike shika sho omukiintu gwomimvo 29 Frieda Amadhila, omuniilonga gwomombaanga yedhina Nedbank a dhipagwa kukuume ke komiihole gwomimvo 22.

Otaku hokololwa omulumentu ngoka ta mono uuhaku moshipangelo shaKatutura sho a li  a ehama momuligu.

Opolisi oya ti oshiningwanima osha holoka mondunda yaAmadhila yokuhiila koWindhoek, mepandaanda tali ithanwa Ballot. Shoka sha eta enyenyeto inashi tseyika natango. Amadhila anuwa okwa li a falwa koshipangelo kukuume ke komiihole konima a mono ta kondjo nomwenyo.

Opolisi oya ti aapangi inaya vula okukwathela Amadhila oshoka okwa thiki a hulitha nale. Olyomakaya ga zi ko, opolisi moshitopolwa shErongo  natango oya manga po omulumentu gumwe sho a dhipaga kuume ke komiihole.

Opolisi oya ti, omukiintu ngoka a tseyika nedhina Lena Williams okwa si sho a tsuwa noombele megumbo lye koUsakos.

Otaku hokololwa kutya nonando Wiliams a li a gandwa kopolisi kutya ina shuna ko kegumbo lye, oshoka kuume ke komiihole okwa nika oshiponga, konima a li a kongwa ihe ina monika, okwa shuna kegumbo lye.

Opolisi oya hokolola kutya omulumentu ngoka okwa iteyela megumbo lyomukiintu ngoka, noku mu tsa noombele pethimbo e ya mo. Omulumentu ngoka okwa mangwa po. -vkaapanda@nepc.com.na