Ombelewa yomupilimaminista oya indila oshigwana kaashi lande iikulya yoshikukuta, oshowo shi lopote uuna sha mono aantu taya landitha.
Omugandjimulombo omukuluntu mombelewa yomupilima Rhingo Mutambo okwa li a kumagidha ngaaka, sha landula iikulya yoshikukuta mbyoka ya yakwa komapungulilo goshikukuta kOshikango.
Iikulya mbyoka oyi na ongushu yi vule N$600 000. “Otatu indile miitopolwa ayihe 14, opo mboka ya inekelelwa iikulya mbyoka ye yi sile oshimpwiyu, e tayi topolelwa mboka ya nuninwa,’’ ta kumagidha ngaaka.
Ngoloneya gwoshitopolwa shaHangwena Sebastian Ndeitunga okwa ti aantu ye vule po40 000 oya shangithwa ya taalela ondjala, ihe aantu ashike 16 000 taya vulu okupewa oshikukuta oshoka iikulya inayi gwana.
Ndeitunga okwa nyenyeta ta ti otashi sitha ohoni aaniilonga yepangelo taya yaka omanga ya inekelelwa iilonga.
“Iikulya oya nuninwa aantu mboka taya nyengwa, ya sa ondjala, ihe otayi yakwa po kwaamboka ye na iiyemo, “ta ti ngaaka. Ngoloneya okwa ti epangelo kalya li lyi na ontseyo ngele mboka ya inekelelwa iilonga aafuthi, oya li ya kutwa ashike ngaashi aantu ayehe haya mono iilonga.
Ta gwedha po ta ti, okwa li ya tseyithilwa kutya omakende gomagandhi ge li 1 800, oga li ga yakwa momapungulilo giinima yoshikukuta. “Aafekelwa yamwe ya li ya adhika niikulya mbyoka, ookuume kaaniilonga yombelewa onene yoshitopolwa shaHangwena, kwa li taya longele momapungulilo moka,’’ ta yelitha ngaaka Ta indile moshigwana opo shi lopote kehe ngoka ta yaka nenge ya mona ta landitha iikulya yoshikukuta momindhingoloko dhawo.
Ta ti, onkundana ndjoka otayi piyaganeke, naafekelwa mboka oye na okupewa egeelo lye ya opalela omolwoshilonga ya longo oshiwinayi. Omupevikuluntu gwopolisi moshitopolwa shaHangwena Zackaria Amakali okwa ti oshipotha shaafekelwa mboka yahamano osha undulilwa komasiku 02 gaApili nuumvo. Ta ti aafekelwa oyo, Jeipo Delany Hilongwa (42), Nehemia Shoovaleka (36) Minna Uukule (38), Gerrie Van Wyk (42), Fillemon Shikongo (44), oshowo Simon Joseph (33).
Otaku hokololwa aafekelwa mbo ya li ya yaka iikulya yoshikukuta pokati komasiku 29 Septemba 2023 sigo 12 January nuumvo. “Oshiningwanima shika osha li she ya puuyelele sho kwa li aaniilonga pamwe naafekelwa mboka, ya li ya dhimbulula kutya omagadhi okwa li taga kolota nonando kapwa li pwa topolwa iikulya omasiku ngoka,’’ ta hokolola ngaaka. Omakonakono oga li ga ningwa sigo aafekelwa mboka taya mangwa. Epangelo olya longitha oomilliona dhi vule N$100, moka mwa kwatelwa iikulya yongushu yoomilliona N$67 oshowo okulongekidha omeya, okuyambidhidha oshigwana omolwoshikukuta.
Iitopolwa yokonooli ngaashi Ohangwena, Omusati, Oshana oshowo Zambezi oya li ya hanagulwa kefundja nokonima omuloka sho gwa hulu, okwa li natago ya ponokelwa kondjala yiimuna oshowo aantu. Omapya ogendji oga li ga hanagulwa po kefundja nokonima omuloka natango kakwa li gwa gwana opo ya likole mo sha momapya. Omaudhigu agehe ngoka ga holoka ogo ga hingi epangelo opo lyi yambidhidhe oshigwana noshikukuta. -vkaapanda@nepc.com.na
-vkaapanda@nepc.com.na