Uuministeli wuuhaku nonkalonawa owa pititha omushangwa kutya otau ningi omakonakono goshali gookaankela yokiilyo yiivalithi yaakiintu.

Owa kumagidha aakiintu opo ya talele po iipangelo miitopolwa ayihe moshilongo opo ya mone omakonakono goshali.

Omimvo dha piti oshipangelo shOngwediva Medi Park osha kala nokulongekidha omakonakono gokaankela ndjoka hayi kwata posheelo shoshivalelo shomukiintu. Kakele komakonaakono gaakiintu, oshipangelo shika shopaumwene osha kala woo hashi ningile aalumentu omakonaakono kiilyo yiivalithi, nago haye ga ningi oshali. 

Omundohotola moshipangelo Ongwediva Medi Park, Ali Elsaket okwa li a gandja uuyelele kombinga yomukithi gokaankela maalumentu.

Ta ti, osha simana aalumentu ya uvithwe ko kombinga yokaankela, oshoka oyendji oya itaala kutya aakiintu oyo ashike iihakanwa yokaankela.

“Okaankela unene ohayi kwata kiilyo yiivalithi yaalumentu, nohayi dhipaga uunene aalumentu omolwaashoka ihaya ikonaakonitha kuyele nomolwaasho inaya tambula ko kutya omukithi ngoka ohagu vulu okukwata aalumentu,” Elsaket a fatulula. Ta ti, oopelesenda 75 dhaalumentu ohadhi kwatwa kokaankela ndjoka omvula kehe, nuunene okuza pomimvo 65.

Elsaket okwa ti, okaankela ndjoka oyi na omandhindhiliko ngaashi, okusitama uusiku olwindji, okululuma moshinena ngele to sitama, okusitama ombinzi, oshowo ombunda tayi pi.

Omukuluntu gwosaala yokumonena uunona moshipangelo shaMedi Park, Laimi Nambahu okwa li a lombwele engungo lyaapulakeni kutya omukithi gwokaankela ohagu dhipaga aantu nogwa nika oshiponga.

“Okaankela yokomapunga oyo tango hayi dhipaga aantu, taku landula okaankela yokomagundji ndjoka unene hayi kwata oomeme oshowo yokiilyo yiivalithi ontintatu,” Nambahu a popi ngaaka.

Omundohotola Beatrix Ndahalele okwa lombwele aantu kombinga yomaludhi gookaankela natango moNamibia mwa kwatelwa okaankela yoshipa, yomomuligu noyokomandjandja.

Ndahalele okwa ti omapekaapeko oga holola kutya aantu ye li 627 000 muuyuni, kehe omumvo ohaya hulitha komukithi gokaankela yokomagundji.

“Nonande uuyelele wothaathaa inawu ya puuyelele kutya oshike hashi eta okaankela yokomagundji, otaku ti ohayi vulu okuza momalovu, omimvo dhomuntu, nenge ya thigululwa kaakwanezimo yopopepi,” Ndahalele a fatulula ngaaka.

Okwagandja iiholelwa yiinima mbyoka tayi vulu okukeelela okaankela yokomagundji, a kwatela mo okuyamitha kontulo, okudhewula olutu mwa kwatelwa okweenda, okwaahila omakaya, okulya iikulya yi na iitungithi ya gwana nosho tuu.

“Eeno, otu shi shi kutya omukithi gwokaankela otagu vulu okukeelelwa nokupangwa, ashike ongele gwa dhimbululwa kuyele. Onkene aantu oya pumbwa okukonaakonwa kuyele opo ya mone omakwathelo ga pumbiwa,” a popi ngaaka.

Ta ti, oshihwepo kehe gumwe a ye komakonaakono opo a kale e shi mpoka a thikama kombinga yokaankela.

Okwa gwedha po ta ti, okaankela ohayi etwa kiikulya yimwe, komakaya, komudhingoloko, koonte dhetango, kekako nokelongithonayi lyiikolitha. 

Oyendji oya gandja iiholelwa esiku ndyoka, nkene omikithi dhokaankela dha li tadhi endele ko, momalutu gawo ihe oye yi keelela sho ya mono epango mbala omolwomakonakono.

–vkaapanda@nepc.com.na