Sho iishana tayi tameke oku udha omeya, opolisi oya gandja omakumagidhi koshigwana opo shi kotokele omaso gomomeya ngoka haga kala gi igalala pethimbo ndika, unene kiitopolwa yokonooli.

Omupopiliko nomugandji gomauyelele gwopolisi moshitopolwa shaShana Frieda Ashiyana okwa kumagidha opo aakulunhu ya se oshimpwiyu opo aanona yaaha dhane omeya, oshoka oga nika oshiponga.

“Ndika olyo ethimbo hatu lopotelwa aanona ya sa omeya, sho kwa li taya litha iimuna nenge sho taya yi nokuza koosikola,’’ ta popi ngaaka. Ta ti aanona ngele taya zi momagumbo, naya kale aluhe ya kumagidhwa nokudhimbulukithwa kutya omeya ihaga dhanwa. Ashiyana okwa ti, aakuluntu inaya thiga we aanona taya ilele yo yene, unene mboka yena oomvula ooshona.

“Aanona oya pumbwa okukala taya silwa oshimpwiyu ethimbo kehe,” ta popi ngaaka.

Omugandji gomauyelele nomupopiliko gwopolisi  moshitopolwa shaHangwena Andreas Nghiyolwa naye okwa popi kutya aanona oya pumbwa okukumagidhwa kombinga yoshiponga shomeya. 

“Longeni aanona kutya omeya ihaga dhanwa oshoka oga nika oshiponga. Omeya oshinima sha nika oshiponga, unene kaanona,” ta popi ngaaka. Ta gwedha po kutya aakuluntu naya kumagidhe aanona kaaya dhane yo ya kale kokule nomithima, omatale oshowo oondungu dhomeya.

Ta kumagidha wo natango aakuluntu mboka haya zi koondingosho ye li kohi yiikolitha pethimbo lyomeya haga kala ga talama miishana, kaaye shi ninge.

Shikole okwa kumagidha wo ooyene yomagumbo opo ya kale uupathi pethimbo ndika, oshoka aafuthi ohaye li longitha wo okweendela kumwe nomvula nomilema opo ya yake. vkaapanda@nepc.com.na