Omupopiliko wehangano lokuyandja ohonde loNAMBTS Titus Shivute okwa kumaida oshiwana opo shi holoke momwaalu munene okukayandja ohonde unene tuu pefimbo e li lomatango manene.
Shivute okwa ti eemhungulilo dehangano kadi na ohonde yawana, oku yelakanifa novanhu va pumbwa ohonde.
Okwa ti NAMBTS oku lile po okukwashipaleka kutya ovanhu ve li momhumbwe yohonde moipangelo ova pewa ohonde opo eemwenyo davo di kale da xupifwa, ashike ti ohashi kala eshongo linene ngeenge ovanaudu va pumbwa ohonde meemhungulilo davo kamuna na sha.
Okwa ti ohonde ei tai yandjwa koshiwana ohai kwafele ovanhu vena omikifi da yooloka ngaashi okangela, oomeme tava pulumuna, ovanhu ngeenge ta tandwa, ovo va mona oiponga nosho tuu omikifi dikwao.
Okwa weda po ta ti omandiki aeshe okuyandjela ohonde otaa twikile nokulonga efimbo keshe Omaandaxa fiyo etitano.
“Oshiwana nashi topolafane ouyelele kombinga yefimano lohonde opo ovanhu va kale ve na eudeko lawana nokukala ve na ohokwe yokuyandja ohonde,” ta ti.
Ponhele yehangano, Shivute okwa pandula oshiwana eshi sha kala shi na ohokwe yokukayandja ohonde komandiki a yooloka ayeshe moshilongo