EENHANA - Peneyambeko Johannes naEmilia Sem ove udite etumba okumona omhito yokulandifa oidjalomwa noikulya yOshiwambo momaulikilo oipindi mEenhana.

Johannes a dile komukunda Oshaango moshitukulwa shaHangwena okwa ti oshi li oshikando shaye shotete ta kufa ombinga momaulikilo oipindi.

"Ovanhu otava holoka momwaalu muhapu okulanda oikutu unene oomeme. Onda pandula okumona omhito ei inandi shi shakeneka nale," ta ti.

Okwa ti ota kala ta kufa ombinga momaulikilo oipindi meedoolopa da yooloka shaashi mboli otashi mu etele oyuuyemo.

Emilia oo ta hondjo oikutu yOshiwambo, okwa ti ongeshefa yaye oye mu etela omauwa mahapu ngaashi okufutila ounona vaye ofikola noshoyo okutunga eumbo laye.

Okwa kumaida ovakainhu vakwao opo va kale tava nyangadala nokuninga eengeshefa davo opo ku kondjifwe ondjala noluhepo.

"Ovakainhu nava xulife po okukala tava xupu movalumenhu molwaashi otashi eta omunhu a dengwe ile a dipawe efiku ta ka topoka okukala ve li mekwatafano lopaihole nomulumenhu," Sem ta ti.

Victoria David a dile kOndangwa nota landifa oikulya yOshiwambo okwa ti mongeshefa yaye okwa futila mo ounona vaye va mana okulihonga koipudilo yopombada.

"Ondi na ounona vavali ve lihongela oupangi noshoyo umwe e lihongela okupangela omalusheno. 

Onghee ngeno kapa li ongeshefa yange ngeno ounona vange inave shi pondola okumana ofikola," ta ti.

Omaulikilo oipindi okwa tamekele Omaandaxa notaa xulu Etitano loshivike eshi.

fhamalwa@nepc.com.na