Ovanailonga vouhaku koshipangelo shaMuthiya otava nyenyeta kombinga yonghalo yoshipangelo shavo osho vati sha ninga oule womafiku ahetatu shihe na omeva.

Ova hokolola tava ti ohava twala omalapi okeembete oshipangelo a ka koshwe koshipangelo shaNandjokwe nosho yo oku ka tala omeva okuwapalekifa moshipangelo.

Ovapangi ova ti unene tuu kokanyofi kokupulumunina ohaku kala ku na eshongo linene la taalelwa koomeme ve lihumbata molwaashi ohava kala va pumbwa omeva okulikwafela konima ngeenge ova pulumuna.

Umwe womupangi koshipangelo oko okwa hokolola ta ti ohava longo noudjuu ngeenge moshipangelo muhe na omeva molwsashi ihava dulu vali okuyandja omayakulo ouhaku e lixwa po kovanaudu.

“Moshipangelo ohamu kala ashike mwa kaka tamu nyika edimba tali di moundjuwo. Ovanaudu nosho yo ovanailonga ihatu longifa vali oundjuwo molwaashi kape na omeva,” ta ti.

Okwa weda po ta ti ova ninga eenghendabala nokutwaalela omeva koshipangelo opo va dule okuyandja kovanaundu vamwe omiti davo.

Omuwapaleki moshipangelo shaMuthiya okwa weda po ta ti onghalo yokuhe na omeva koshipangelo oya eta oshipangelo shi kale sha kaka molwaashi ihapa kala pe na omeva okuwapalekifa.

“Ohatu longo noudjuu ngeenge hatu wapaleke oshipangelo. Kashipu okulongela monhele ya kaka tai di edimba molwaashi otashi dulu okueta omikifi odo hadi dulu okuetwa kekako,” ta hokolola.

Eshi a kwatafana naKundana omukulunhuwiliki wouhaku moshitukulwa shaShikoto Joshua Nghipangelwa okwa ti ombelewa yaye oya didilika omashongo a taalelwa koshipangelo shaMuthiya unene tuu eshongo lomeva a pata omafiku ile eevili dimwepo mefiku.

Okwa ti omeva koshipangelo ohaa kala a pata molwaashi omunino womeva wa dja kOndangwa hau kala tau ende nakashona.

 “Otwa tameka nale okutunga otenga yomeva tai kala moshipangelo opo i kale tai di longifwa ngeenge omeva a pata,” Nghipangelwa ta ti.

Okwa weda po ta ti ovakulunhu voipangelo nava kale alushe tava lopotele ombelewa yaye pefimbo ngeenge koipangelo ku na omaupyakadi.