ENGELA - Omukulunhufikola wokoNghiteke Primary School moshitukulwa shaHangwena, okwa hokololela oshifokundaneki nghee ofikola ya hepa noi na omhumbwe yomatungo.
David Nehemia okwa ti yee nghee e ya poNghiteke mo2020 ina hanga po nande ombelewa i li xwepo omo ta dulu okukala omutumba. Okwa popya kutya yee okwa fikila mokanduda kamwe kanini noka finana oko haka tuvukile omambo aa akulupa pofikola.
Okwa twikila kutya okanduda oke na ashike ekende limwe alike koo ihaka mono nande omhepo ya wana.
Nehemia okwa twikila kutya ofikola natango oi na omhumbwe yakula yeengulu. Ofikola aishe neudo vati oya tambula ashike omwaalu wovanafikola ve li 350 molwomhumbwe yeengulu. “Ovanafikola vamwe ohava kala omutumba meengulu doipeleki odo da kulupa nodi na outalala wamatutu oshoyo oupyu wanyaa kehonga,” Nehemia ta tumbula.
Omukulunhufikola okwa twikila kutya pofikola ope na onhele yakula oyo ihe na nande etungo limwe notai wana okutunga nande osekundofikola. Okwa weda po yoo kutya otashi ka kala shiwa unene ngeenge epangelo le tu dimbuluka mokuweda po omatungo mofikola shaashi ovanafikola vahapu otava ka mona omhito yokutambulwa mofikola shoo ota shi ka yandja natango omhito yoilonga kwaavo opo va djala omanguwo. “Ohatu indile nefimaneko linene keshe tuu ou tadulu okuyambidida ofikola e tu vatele shaashi ohatu li hatu pi. Natango ohandi pula yoo epangelo li tale nawa ngeenge tashi ya peyambidido loshikumhungu sheefikola edi da mona oixuna,” Omukulunhufikola ta tumbula.
Omuhongifikola umwe a pula aha tumbulwe kedina okwa hokolola kutya yee oku udite ofikola yavo ya fa ya dimbiwa kepangelo laNamibia. Okwa weda po kutya voo ihava mono nande ovanambelewa vonhumba have ya okutalelapo ofikola shihe fi ookansela voshikandjohoololo shaNgela.
Omuhongi okwa twikila kutya ovahongi vahapu pofikola kave na ombelewa omu hava kala omutumba. “Vahapu ohave lidiinikile ashike meengulu davo odo nado di li monghalo iheshi okulidinikilwa,” omuhongi ta ti.
Okwa weda po yoo kutya yee okwa hala ovanambelewa ava ve li moshikondo shehongo va tameke okuningila eefikola omapekaapeko shaashi dihapu domudo oda pumbwa omakwafo.