Omolwa ompumbwe yomeya moshitopolwa shaHangwena, omupilimaminista Saara Kuugongelwa-Amadhila Olyomakaya okwa gandja omboola onene, ontiyali, moshitopolwa moka. 

Omboola ndyoka yongushu N$604 641.25 oya gandjwa pethimbo kwali taku ndhimbulukiwa esiku lyemanguluko, momukunda Ohamutwetautende moshikandjohogololo Epembe.

Kuugongelwa-Amadhila okwa yelitha kutya omboola ndyoka otayi gandja omeya komikunda 11 moshitopolwa shaHangwena.

“Omboola ndjika otweyi gandja omolwa ompumbwe twa mono moshitopolwa shaHangwena, oshowo okueta omeya popepi naakalimo mboka haya ende oondjila oonde okuka teka omeya,” ta fatulula ngaaka.

Kuugongelwa-Amadhila ta ti, sho kwali a talele po oshitopolwa shoka mo2022, okwali a ndhindhilike kutya aakalimo oyeli mompumbwe yomeya ga yela. Ta fatulula kutya opoloyeka ndyoka yoku eta po omboola okwali ya tulwa miilonga kuuministeli wuunamapya omeya nomatalululo gomavi oshowo ombelewa yomupilima minista.

“Ombelewa yomupilima minista oya yambindhindha onga oshinakugwanithwa shopoloyeka yoshikuku noshimaliwa N$604 641.25, omanga ombelewa yuunamapya ya yambindhindha niilonga yoopaipi kongushu yoshimaliwa N$ 2 760 522,00.

Aakalimo yomoshitopolwa oya ningi ethimbo taya longitha omeya ga nigila gamwe taga zi momithima omanga yamwe ya kala noku teka moondungu. Onkalo ndyoka ya pe kaakalimo ompito onene okukwatwa komauvu oshowo oku ethitha omaso. Uuministeli wuunamapya omumvo gwayi owa tseyitha kutya oomboola 120 odha yonagulwa koshigwana.

– vkaapanda@nepc.com.na