Ovadali vokaana ka xulifa omafiku manini lela eshi ka lekelwa moshipangelo shaShakati ova ti ova hala okufutifa epangelo molwouhefi wovapangi oo wa etifa efyo lokaana kavo.

Xe yokaana Johannes Ananias okwa ti omukulukadi waye okwa monene okaana kokamati momafiku 28 Juni 2023, e ka monena moshipangelo shaShakati, ashike oka ka xulifila keumbo konima yomafiku avali eshi ka lekelwa mo moshipangelo.

Ta ti ove udite oudjuu shaashi ovapangi ove va holeka osheetifi shefyo lokanona kavo. 

Ananias ta hokolola ta ti okaana kavo oka lekelwa mo moshipangelo ka tulwa okamunino mokanya ashike ovapangi inava fatulula kutya okamunino oko okashike, ova ka uda ashike nale kutya okaana mboli ok ali ka fudila mo omeva okoshidalelo, pefimbo lepulumuno.

Ta ti eshi okaana ka dalwa ovapangi ove mu lombwela ashike kutya okaana oka dalwa kehe na oukolele nawa, vati ouluvi wako kau li ponhele nomesho ko okapofi, onghee oke na okukala meembete, manga ta ka ti po xwepo.

“Eshi nda lombwelwa ngaho, inandi pataneka nande ovapangi. Konima eshi okaana ka ninga omafiku meembete, ovapangi ova ka pula omukulukadi wange ngeenge otava dulu okulekelwa a ka kale nokanona keumbo ile ota kala moshipangelo,” Ananias ta ti.

Shaashi vati omukulukadi okwa hangika nale a loloka mo moshipangelo, okwa ti ashike ota dulu a ka kale nako keumbo.

Eshi okaana ka lekelwa vati oka li ke na okamunino mokanya shaashi kaka li taka dulu okulya kuko vene.

Keumbo, oka ninga ko shike omafiku avali koo otaka xulifa.

Ananias okwa ti eshi okaana kaye ka ka xulifa okwa ka kwatwa kediladilo a ka pule ouyelele koshipangelo u na sha nembo omu mwa shangwa ehokololo lokaana fiku ka dalwa.  Okwa ti embo ola yelifa kutya okaana oka xumina omeva omoshidalelo, oo e ka ya komapunga, shoo vati tashi ka etele oudu wokomapunga.

“Ouyelele ou kape na ou a li e u tu lombwelwa atushe naina yokaana,” Ananias ta ti. Okwa tumbula kutya ovapangi ava ve mu pa ouyelele oo, ovo ve mu leshela ehokololo alishe noku mu fatululila shaashi ekalata ola shangwa mOshiingilisha ashike ye iha udu nawa elaka olo.

“Eshi oshaka fininika nge natango ndi tale nawa okakalata kokaana kange omo nde ke litwa epandja la taulwa mo, eshi nda pula kutya ovapangi ove li taulila mo shike, ova lombwela nge kutya ou e li taula mo oku shi elalakano lasho,” Ananias ta tumbula.

Okwa ti oshiningwanima eshi itashi mu kofifa omanga ina mona kutya ou a efela okaana ka ye omeva  komapunga olyelye .

“Onda hala okupatulula oshibofa, opo ndi dule oku va futifa omwenyo wokaana kange, manga ngaho ve ka ponifa omeva ndele tave shi holeke nge,” Ananias ta ti. 

Ananias okwa ti okwa ninga yoo onghendabala opo oshiningwanima eshi twale kombelewa yomukulunhu woshipangelo, oko a pulwa a shange ehokololo alishe nghee la enda. 

Ta ti eshi okwe shi ninga ashike  okudja opo ina mona vali nande oyo ongodi ya dja koshipangelo.

Omupedukulunhu woshipangelo shaShakati Dr Ndawapeka Nhinda okwa ti kutya olopota inai fika kombelewa yaye.

“Ohandi ka kala ndi li mombelewa Omaandaxa, ashike ondi na okupula matrona kombinga yasho, fye tu shi konaakone,” Nhinda ta ti.