ONGWEDIVA - Omupopiliko welelo laUkwanyama Andrew Naikaku okwa koleka ta ti omhangu yopamufyuululwakalo oya yakula oshibofa sha patululilwa omufita mukulu weongalo laRuacana Elcin Hendrick Shuudeni.

Okwa ti oshibofa osha patululwa kuJeremiah Mushunina molwaashi vati a kengelelwa kuShuudeni nokuningilwa omahepeko opaixulo ashike ine mu futa.

Meenghundafana va ninga naKundana onghela Naikaku okwa ti omhangu yopamufyuululwakalo otai ka tula po efiku loihokolola omo Mushunina naShuudeni tava ka ufanwa komhangu.

Onghee okwa ti omakonakona kombinga yoshikumungu eshi otaa ka ningwa konima yoihokolola.

Mushinina weedula 24 a dja komukunda Onhuno okwa hokolola ta ti okwa hala Shuudeni e mu fute oshimaliwa sheeN$10 000 osho kwa li e mu danekela tete opo va ye naye vati moixulo.

“Okwa kengelela nge kutya ota penge oilonga mopolifi. Okwa longela nge omunyonena wopaixulo molwashi paife onda nyika ounghundi,” ta ti.

Onghee okwa ti elalakano a ka patulule oshibofa komhangu yopamufyuululwakalo okufutwa oshimaliwa osho kwa li a udanekelwa kuShuudeni.

Omudo wa dja ko ongeleka yaElcin oya kufa moilonga Shuudeni noshoyo omudiakoni weongalo laKahao Elcin Simon Ndaumbwa molwaashi vati taku fekelwa kutya ove li moshikumungu shomashenge.

Lwopokati opo, Mushunina okwa li ka kwatwa po muDesemba shaashi vati ka nyeka ko ongodi yaShuudeni nokudja opo Shuudeni okwe mu patululila oshibofa.

Mushunina okwa ninga oule womwedi umwe modolongo nokonima okwa pewa omhito yoku li futila mo modolongo noshimaliwa sheeN$700.

- fhamalwa@nepc.com.na