Omukiintu gwoomvula 51 okwa si konima sho a ehama noonkondo moshiponga shohauto ndjoka ya kandoma mOmaandaha kondje yolukanda lwaKalkfeld moshitopolwa Otjozondjupa.

Omupoiliko gwopolisi moshitopolwa shOtjozondjupa Inspector Maureen Mbeha okwa ti nakusa okwa ndhindilikwa kutya oye Romantha Lizele Nanuses.
Osheenditho moka a li anuwa tashi zilile kombinga yOtjiwarongo lwopo15h30 osha thigi po opate nokugalangata. 

Oshiningwanima shoka osha ningwa oshinano konyala ookilometa 21 muuzilo waKalkfeld.

Nanuses okwa hulitha kuuwehame pethimbo a li ta falwa koshipangelo. 

Uunona we uumati wuukwanambwiyu woomvula ndatu nomulumentu gumwe ngoka a li naye mohauto oya ningi uupulu wowala, Mbeha ta ti.
Ooluhupe mboka nayo wo oya falwa koshipangelo kOtjiwarongo noonkalo dhawo otadhi nuwa omeya. 

“Sigo ongashiingeyi kapu na uuyelele kutya olye kwa li ta hingi oshoka mohauto omwa li aakulutnu yaali, yo aantu ayehe ya li mohauto moka oya adhika yu umbwa mo,” Mbeha ta yelitha. 

Omakonaakono gopolisi otaga tsikile. -Nampa