Opolifi moshitukulwa shaShana oya lopota oshibofa shonghendabala yedipao omo omukainhu weedula 23 a tuwa nombele pefimbo a li ta anuna olwoodi pokati kakahewa kaye nomukainhu mukwao.
Oshiningwanima eshi osha ningwa exuliloshivike polukanda laAdolf popepi nOngwediva.
Ovo va li po poshiningwanima vati ova hokolola kutya omukainhu ou okwa tuwa nombele yokapi kohonda yomukainhu oo a li ta tanguna nakahewa kaye.
Otaku hokololwa vakainhu vavali va tameka oku tangunina ponhele yomanwino ili puAdolf lwopo14h00. Kaku shivike naanaa kutya oshike sha etifa eenhangua shike mwene wonhele vati okwe va lombwela va fiyepo onhele yaye. Umwe womovakainh okwa ya, ye umwe ta fyaala po nakahewa kaye oo a ka ninga oshihakanwa.
Lwopo 19h00 yokomatanga, omukainhu ou kwa li a ya okwa aluka e li nohonda yaye. Vati eshi e ya okwa tameka vali neenhangu, fiyo mwene wonhele eva hanauna noku va lombwela vali va fiye po onhele yaye.
Omukainhu ou a uhala pondingosho vati okwa pula kahewa kaye (oshihakanwa) opo e mu findikile kombinga ikwao yopate.
Vati eshi tava tauluka opate yakula, yOngwediva-Ondangwa, vati ova mona okakadona eli nohonda yaye tave va shikula. Kaadona vati okwa fikila ashike ta kwata mukwao pofingo, ashike winya okwe mu tona eenghono ndele te mu li kanyuna.
Eshi olwoodi ta li twikile, kahewa ka nakulwa okwa kendabala ngeno oku va ya pokati, ashike ohaluka okwa tuwa nombele ndele ta ongotele.
Ovo va li po otava ti kakadona nakushikula vakwao oye vati a kupula ombele yokapi komumati waye, ndele omumati tatu nakuhangukununa olwoodi medimo, osho sha etifa omandjadja aye a we mo.
Omupopiliko wopolifi moshitukulwa shaShana Thomas Aiyambo okwa ti kutya kakadona nakuyandja ombele komumati waye, nomumati aveshe ova kwatwa po. Ta ti kakadona vati okwa ina hala oku yelifa ngeenge oye a yandja shili ombele, ile omumati waye oye shili a twa omunhu nombele.
Kahewa koshihakanwa okwa tumbula kutya naye ke shishi lela kutya nakutwa kahewa kaye omukainhu oo a li ta lu naye ile omumati shaashi okwa li kwalaula, ashike vati okwa mona kaadona ena ombele yokapi.
Oshihakanwa vati oshi li monghalo ili xwepo, ovafekelwa aveshe vavali ova tulwa moipandeko kopolifi.