ONDANGWA - Omukainhu weedula 37 ou vati a kwata omonamati onghonga okwa anyenwa omhito yokulifutila mo modolongo eshi a holoka momhangu yaNdangwa onghela.

Oshibofa shaye osha undulilwa komafiku 13 Mei 2024 omanga taku ningwa omakonakono omoule.

Omukainhu ou ota pangulilwa oshibofa shekwatonghonga lomonamati weedula omuwoi.

Oshiningwanima osha ningwa komukunda Ongenga moshitukulwa shaShana oshivike sha dja ko.

Otaku hokololwa kutya omukainhu  okwa denga yoo vali okaana tuu oko noshikuni shomundilo kombuda.

Opolifi oya hokolola tai ti okwa denga okaana kaye shaashi inaka hala okuya naye moixulo. 

Ouyelele owe uya kombada eshi okaana ka lombwela umwe womushiinda shavo kutya oka longelwa omunyonena wopaixulo kuina.

Omupanguli Lloyd Munyungano okwa popya ta ti oshibofa eshi oshakula molwaashi itashi ulike efano liwa moshiwana ngeenge omukainhu ou okwa pewa obooloha.

Okwa ti oshibofa osha pumbwa omakonakono omoule.

Munyungano okwa ti ovakwapata vomutamanekwa ou otava ka kwatafanwa navo pefimbo lomakonakono.

Pefimbo e li momhangu, omukainhu ou okwa popya ta ti ite shi ningi vali okuya moixulo novalumenhu.

“Shapo ohandi yi moixulo ngeenge nda kwatwa onghonga,” ta popi e li momhangu.

Okwa lombwela omupanguli ta ti omulumenhu waye oku li koWindhoek ashike okwe mu lixula neudo muJanuali.

Okaana oke li momake ovaxungimwenyo taka pewa omayakulo exungomwenyo.

-fhamalwa@nepc.com.na