Opolifi moshitukulwa shaShana otai konakona oshibofa shomukainhu weedula 37 taku fekelwa kutya vati okwa longela omonamati waye weedula omuwoi omunyonena wopaixulo.

Oshiningwanima osha shingwa komukunda Ongenga moshikandjohoololo shaKaku oshivike sha dja ko. 

Omupopiliko wopolifi moshitukulwa shaShana Inspekta Frieda Shikole okwa hokolola ta ti omukainhu ou okwa kwatwa po Etivali.

Otaku hokololwa kutya omukainhu ou vati okwa longifa okaana kaye oilonga youpaani shaashi vati a lombwela okaana vaye nako moixulo.

Ouyelele ou owe uya kombada konima eshi okaana ka lombwela umwe womushiinda shavo.

Okudja opo omushiinda shavo okwa twala okaana kopolifi opo ka ka ningilwe omapulapulo.

Opolifi oya hokolola tai ti omukainhu okwa xwika yoo vali omonamati waye ou konima eshi kwa li ina hala okuninga eshi ta lombwelwa kuina kutya nava ye naye moixulo.

Okaana oka xwikwa pombuda noshikuni noke li monghalo i li xwepo. Omukainhu ou ota holoka momhangu nena nota pangulilwa oshibofa shekwatonghonga noshoyo oshibofa shomahepeko omomaumbo.

Omakonakono opolifi otaa twikile moshikungu eshi.

Opolifi oya kumaida ounona opo va kale alushe tava lopotele ovashiinda shavo ile ovahongifikola ngeenge tava ningilwa omahepeko omomaumbo.

Oshiwana osha kumaidwa shi longele kumwe okukondjifa oimbuluma noshoyo omahepeko omomaumbo komidingonoko davo.

- fhamalwa@nepc.com.na