Opolisi moshitopolwa Otjozondjupa otayi konakona shoka sha etitha omaso gaali, gomunamimvo 21 ngoka taku fekelwa a pondo omona e ta imangeleke.

Sha ikolelela kolopota yopolisi yiiningwanima hayi holoka mehuliloshiwike, oshiningwanima osha holoka Olyomakaya molukanda lwa li halu ithanwa nale Ombili.

Otaku hokololwa kutya omukiintu ngoka a li a pondo omona gwomimvo ntano okwa li i  imangeleke konima, netompelo inaali tseyika.

Omukiintu ngoka a tseyika nedhina Hileni Vemujendavi okwali a monika ku kuume ke ngoka a li adhaa iimangeleka nondhalate moombuli dho mbashu ye.

Kuume ke anuwa okwali a tokola okuthika pegumbo lye konima a li a limbililwa sho a kala nokudhenga ihe ita yamukulwa.

Sho anuwa a li a thiki pegumbo mpoka okwa li a kundwa kezimba edhigu, ndyoka lya li lye mu limbililitha sigo a ithana opolisi.

Opolisi okwa li ya teya po omweelo nokwali ya adha okanona ka lala pevi omanga olutu lwe lwa endjelela moombuli.

Iiwike iyali ya piti, omukiintu gwomunyasha okwa li a mangwa po kopolisi moshitopolwa shaKhomas sho kwa li a dhengagula nokuponda omona gwomimvo ntano.

Moshiningwanima inaashi faathana, okanona komimvo mbali oka si sho anuwa ka gwile mehela lyontaku mehuliloshiwike.

Otaku hokololwa kutya oshiningwanina shoka osha holoka momukunda Iindongo yaKeelu moshitopolwa shaShikoto.

Opolisi oya hokolola kutya omukulupe okwa li a thigi aatekulu ye yomimvo mbali oshowo ndatu megumbo omanga a ka futa osikola.

Megumbo moka omwa li mwe ya omuyenda lwopotundi 13h00, ngoka a li a tsakaneke okanona komimvo ndatu komweelo, hoka ke mu lombwele kutya mukwawo oku li mehela lyontaku.

Sho a yi po okwa adha okanona hoka itaaka inyenge.

vkaapanda@nepc.com.na