Aletta Shikololo
WINDHOEK –Cynthia Schimming ngoka a kala oomvula omilongo moshimpungu shomauliko, omanduluka gomizalo omipe okwa pewa epapa lyokusimaneka onkalamenyo ye moshimpungu shuufuuli gwiizalomwa.
Schiming ngoka a igilila omapole he ga pewa muuyuni onga omundulukipo gwomizalo, omweendi Omunamibia ngoka a li wo ha gandja ootundi miiputudhilo yopombanda okwa pewa esimaneko ndika enene pegandjo lyotangotango lyomapole tali ithanwa Katutura Fashion Week (KFW) Awards ndyoka lya li ko ehuliloshiwike lya za ko.
A valwa pethimbo lyepangelo lyokatongotongo ye e na ombinzi yOshindowishi nOtjiherero, omunamimvo 66 Schimming ke shi ashike omunduluki po gwiizalomwa, ashiike okwa longa wo aanasikola oyendji mboka haya ilongele oku eta po iizaloma moshilongo noyendji oye na nale nokuli oongeshefa dhawo nayamwe oyo ookatyoko moshimpungu shika.
Nonando a li a pandula etumbaleko ndika lya za ko-KFW, Schimming ngoka ihaa lile okathima koluko okwa ti, “Onda li nda pandula sho nda mono kutya nani ope na ngaa aantu ya pandula shoka nda kala nokulonga uule woomvula odhindji dha za ko, ashike ondi wete nda kulupa niizalomwa yandje otayi ka hulila moongulu dhomapungulilo, ashike natango ondi wete nda pumbwa okutsikila.” Ta dhimbulukwa onkalamwenyo ye petameko, Cynthia okwa li a tameke okweenda ta ulike iizalomwa moomvula dho1970 sho a li ashike e na oomvula 20, naashika okwa li ashike e shi tameke onga oshinima e shi hokwa nosha li sha ningi eithano lye, nokwa li a koko mulyo nopondondo yopaigwana.
Nonando oshimpungu shiizalomwa moNamibia natango inashi koka naana, ota ti oshimpungu otashi koko uupyakadhi owo ashike mbuka kutya otashi koko momukalo gwa puka. “Omasiku ngaka mbela kehe omuntu omweendi ashike nenge omunduluki gwiizalomwa onkene ongushu kayi li pamuthika we. Aanduluki yiizalomwa oyendji inaya itula mo nando, shoka oyendji kaye uvite osho shoka kutya okunduluka po iizalomwa kaku na sha ashike nokwoopala, ashike okwa kwatela mo okudhilaadhila muule osho wo iizalomwa yoye yi iwetikile,” osho Cynthia a ti ngaaka.
Schimming okwa li wo a pupula kombunda aanduluki yiizalomwa yamwe mboka ye shi pondola.
Ta ti: “Onga omulongi moshiputudhilo shopombanda ondi shi kutya ope na aalongwa yandje yamwe mboka taya longo iilonga yu uka, po pe na ishewe yamwe mboka taya tapa iilonga yayakwawo.
.