ONGWEDIVA – Ongudu yopapolitika yoPDM oya pitila omukulunhu wopolifi opo a ulikwa mOhangwena, tai pula olopota yomeendelelo ina sha nonghalo omo ta mu longele ovapolifi vokeengeba. 

Tauno Namholo omukwatakanifi woPDM okwa ti ovanambelewa tava longele keengaba daNamibia naAngola, kombinga yaHangwena, otava longo monghalo ita inuwa omeva, unene tuu apa hava nangala. Okwa ti ovakalekipo veameo ava ohava di meetenda omo tava file mo outalala nove li moshiponga shakeshe tuu eshi tashi dulu okuva ponhokela efimbo keshe. 

Ohava teleke pondje, voo tava longifa oixwa ngeenge vahala oku li vatela osho ina shinyika oukoshoki, Namholo ta ti. 

Molwa onghalo eli ihe fi yopanhu, eengeba vati paife tadi nonatelwa ashike kovapolifi vovakulunhu shaashi ovanyasha ova fiyapo oilonga vaya koiputudilo imwe ile veke li hongela omaifano amwe elili. “Eshi osha pa yoo ovalandifi voingangamifi oshoyo noinima aishe ei inai pitikilwa moshilongo, mwa kwatelwa omahooli, va dule okupitifa oinima yavo noupu okudilila moAngola shaashi ovapolifi vovakulunhu itava dulu okulotoka, Namholo ta ti. 

Namholo ta ti okwa teelela Komufala Ottilie Kashuupulwa a ete mo elunduluko monghalo yovapolifi tava longele keengaba. “Otushi shi kutya ovapolifi ava ohava longo noudiinini tava amene oshilongo, novapumbwa okufilwa oshisho shaashi otava li tava pi, Namholo ta tumbula. 

OPDM natango oya hala Kashuupulwa aninge omapekaapeko mwaasho sha popilwe komukulunhu wopolifi mukulu Elizabeth Sibolile kutya ovapolifi vokeemgaba ova pewa omaumbo ashike inava hala okukala ta vafutu oshimaliwa shokomwedi. Sibongile okwa tile ovapolifi ovo ova hoolola oku kala havadi meetenda, ashike ovapolifi ova patana kutya ova pewa omaumbo. 

Omupedu kulunhu wopol i f i moshitukulwa shaHangwena Zakaria Amakali okwa ti ita dulu manga oku tya ko sha koshinima osho. 

Commissioner Kashuupulwa ou opo a tameke etemo mu 1 Aguste 2023 okwa lopotwa kutya okuli mokafudo nokwateelelwa a alukile ketemo mo 14 Aguste 2023. 

– taimihaihambo2000@gmail.com