Opolifi moshitukulwa shaShikoto oya patululila omukulupe womido 69 oshibofa shekwatonghonga vati la ningilwa okatekulu komido nhatu.

Omukulunhu koshikondo shokukonaakona oimbuluma mOshikoto Deputy Commissioner Titus Ekandjo okwa hokolola kutya oshiningwanima eshi vati osha ningwa mOlomakaya lwopotundi 13h00 momukunda Etuli moshikandjohoololo Omuntele.

Okaana aka ohaka di meumbo limwe nomufekelwa. Mumwaina waina yokaana oo naye a dalwa komufekelwa oye a lopota oshiningwanima kopolifi. 

“Otaku hokololwa omukulupe oo vati a lombwela okaana ka kale naye meumbo eshi vakwao vaka lifa. Konima yefimbo okwa ka hangwa nee komonakadona ta tu okaana oko nominwe poilyo yoidalifi,” Ekandjo ta fatulula.

Vati eshi hasho oshikando shotete omulumenhu ta ningile okaana aka omunyonena wopaixulo. Omudo wadjako natango okwali ahangelelwa teshi ningi, ashike oshimbuluma osho kakwali sha lopotelwa opolifi. 

Omulumenhu ou ota holoka nena momhangulilo yaMangestalata mOndangwa. 

- Nampa