Victoria Kaapanda

ONGWEDIVA-Omukulupe gwomimvo ethele  101, gwomomukunda Omeege, moshikandjohogololo shaShakati shokuuzilo okwa  ikutha omwenyo sho a imangeleke mOlyomakaya gehulilo shiwike lya  zi ko.
Omupopiliko nomugandji gwomauyelele  moshitopolwa shaShana, Frieda Shikole, okwa ti oshiningwanima shoka oshali shaholoka potundi 19h00.

 “Mesitilde Iindongo ngoka a li a monika komutelukulu gwe gwomumati, okwa imangeleke nongodhi mondunda yimwe yoomwiidhi megumbo lye. Ina thiga ashanga nande omulombo gwasha shinasha ne so lye, po kapena  ngoka ta fekelwa shinasha ne so lyomukulupe nguka,” Osho Shikole a hokolola ngaaka. 
Shikole okwa tsikileko woo tati kutya aakwanezimo yanakusa oya tseyithilwa, na omakonaakono gwopolisi moshiningwanima shoka otaga tsikile.   

Moshiningwanima ina shifathana sha za koshitopolwa shayooloka shedhina Omusati monooli omo tuu moka, aalumentu ye li yatatu yomimvo 32, 37 oshowo 42 oya li ya mangwa koomiya dha shinana sho ya adhika yena iipa yoshinamwenyo shagamenwa shOngaka yongushu N$ 150 000.

Okwa hokololwa kutya iipa yOngaka mbyoka oya li ya adhika ya holekwa konima yombuta yo hauto ndyoka kwa li taya hingi. Oya li ya kwatelwa mopate yo kuya kOkahao, momukunda Oniimwandi Etitano lya zi ko.
Omupopiliko nomugandjimulombo  gwopolisi moshitopolwa shaMusati Lineekela Shikongo okwa ti omukiintu gwomimvo 37 okwa li a mono oshiponga, sho a li a yahwa nondjembo metundji.

Oshiningwanima shoka osha li sha holoka Etine lyoshiwike sha zi ko, pehala ta li ithanwa Outapi Fire House, mondoolopa ya Outapi potundi 19h00 yokomatango.

Otaku hokololwa kutya omulumentu ngoka ayaha Wilhelmina Ndjembela, omuniilonga pamwe naye mehangano lyuusekuliti ta li ithanwa 6000 service na ondjembo ndjoka ya  longithwa oku etitha oshiponga shoka  oye hangano olyo tuu ndyoka.

Ashike Shikongo okwa hokolola kutya kapuna naanaa uuyelele wothaathaa mboka tawu vulu oku tseyitha shoka sha ningwa po.
Omufekelwa Lisias Andreas Nangula 26, okwa mangwapo kopolisi na okwa tegelelwa a holoke mompangu oshiwike shika.