Omukulupe weedula 60 okwa tulwa mokatoo noku kufwa oshimaliwa shaye shoN$90 000 komavalulilo ombaanga.
Omukulupe ou e li omukalimo womOkongo vati okwa kanifa oshimaliwa shaye mexuliloshivike konima eshi a dengelwa ongodi komulumenhu ehe mu shi.
Omupopiliko wopolifi moshitukulwa shaHangwena Warrant Andreas Nghiyolwa okwa hokolola ta ti omukulupe ou okwa dengelwa ongodi efimbo lomutenya komufekelwa te mu lombwele kutya okwa pumbwa okutuma omaukwatya aye opo a dule okutuminwa oshimaliwa shaye shimwe inashi futwa, shaashi omukulupe ou womukainhu vati opo a i mopendjela.
Konima yefimbo eshi a tuma eenomola odo a pulwa, okwa mona ashike kongodi yaye ya lopota kutya komavalulilo aye okoStandard Bank okwa dja oshimaliwa.
Otaku fekelwa nakudengela omukulupe okukala e na ouyelele kombinga yomukulupe ou kutya opo a pendjelwa.
Omukulupe vati ita dimbuluka kutya ondaka oya yelye onghee kape na ouyelele kombinga yomulumenhu noshimaliwa inashi monika.
Oshiningwanima shikwao, omukulupe weedula 61 okwa tulwa mokatoo komulumenhu nokukanifa oshimaliwa shoN$166 000 sha kufwa kongodi yaye mOshakati.
Otaku hokololwa kutya omukainhu ou okwa ya meenghundafana nomulumenhu kwa li ta ende peumbo laye noku mu lombwela kutya ota pukululwa.
Okudja opo vati omukulupe okwa dja mo meumbo nokutwala omulumenhu konhele oyo a uka.
Opolifi oya ti manga ve li mondjila okwa dja otaksi nokulombwela omukulupe opo naye a londe motaksi va uka konhele oku ta pukululwa.
Okudja opo omulumenhu ou okwa ningila omukulupe omatilifo kutya ote mu dipaa ngeenge ite mu pe eenomola daye dopaumwene dombaanga mongodi.
Otaku hokololwa kutya ovalumenhu ava ova kufa oshimaliwa kongodi yomukulupe va ukifa komavalulilo eembaanga davo.
Neudo koshitukulwa shaKunene okwa lopotwa omuhongifikola weedula 52 naye a tulwa mokatoo nokukanifa oshimaliwa shaye N$11 500 sha kufwa kombaanga yaye.
Opolifi oya ti omukainhu ou okwa lombwelwa kutya okwa findana oshimaliwa kehangano lo-MTC konima eshi vati a shangifa okakalata kaye komongodi.
Onghee okwa pulwa opo a tume eenomola di li kokakalata kaye kombaanga nokukanifa oshimaliwa.
Lwopokati opo, omupopiliko wehangano lo-MTC Erasmus Nekundi okwa kumaida oshiwana opo shiha tumine ovanhu eenomola da shangwa koukalata veembaanga davo.
“Kaleni mwa kokotoka ngeenge ta mu popi novanhu meengodi molwaashi ovanhu paife ove lininga ookalyamupombo,” ta ti.