Okwa li a ka hakulifa okamonamati ke na oudu wopamaidiladilo, ashike ondudu oye mu lombwela kutya naye oku na omayoka molutu.
Omukulupe weedula 61 vati okwa tulwa mokatoo kondudu konima eshi kwa li a futifwa oshimaliwa shoN$116 000.
Oshiningwanima osha ningwa momafiku 30 Mai 2023 mOshakati ashike opo sha lopotwa oshivike sha dja ko.
Ondudu yomOshakati ei oya shivikila nawa komalungula oko ovahakulwa vayo hava kala tava yandje omaumbangihokololo, nohai ningi yoo ouvidio omo vati hai yandje oimaliwa kovanhu momapandaanda.
Eshi a kwatafana naKundana omulumenhu iha longifa naanaa oshipala shaye mouvideo vaye okwa koleka kutya okwa pewa shili oshimaliwa komukulupe ou, ashike okwe li popila ta ti ina futwa shili oN$116 000 ashike okwa futwa N$108 000 komukulupe.
“Tete onde mu pula opo a fute N$8400 nokonima eshi nda kwafela okaana kaye okwa ka tya naye okwa hala okupangwa,” Ondudu tai ti.
Ta ti konima omukulupe ou okwe ke mu futa oshimaliwa shoN$100 000, sha dja kehalo laye
mwene, ashike ye (ondudu) oshimaliwa osho ineshi longifa.
Okwa hokolola kutya konima okwa ka shunifa ko oN$80 000 komukulupe oo.
Omulumenhu ou ta ti ye kefi ondudu yoshikengelela.
“Kandi shi ombudi ame, ngeno okwa li handi vake ngeno oshimaliwa shomukulupe ina ndishi mu shunina. Ovanhu otava ka keke edina lange,” ondudu tai ti.
Okwa didilikwa ondudu ei hai tula ouvidio komalangula vovanhu tava popi nokuitanga konima ngeenge va kwafelwa kondudu.
Onghee naashi osha eta opo ovanhu vahapu va kale ve na ohokwe yoku ka pangwa kondudu ei.
Omukulunhu wopolifi moshitukulwa shaShana Commissioner Naftal Sakaria okwa hokolola ta ti ondudu oya shunina nakuninga oshihakanwa oshimaliwa shaye shimwepo (N$80 000) konima eshi omukulupe ei patululila oshibofa.
Sakatia ta ti omukulupe okwa kufa mo oshibofa konima eshi a futilwa oshimaliwa shaye.
Sakaria okwa hokolola ta ti omukulupe ou okwa li a twalwa okaana kaye kokamati kondudu ka kwa pangwe oudu wopamadilaadilo.
Okudja opo ondudu oya pula omukulupe opo a fute N$400 shoku li shangifa nokonima omukulupe okwa pulwa yoo opo a fute natango N$8000 yokupanga okaana kaye.
Konima ondudu vati oya lombwela omukulupe kutya naye ota vele e na omayoka molutu, onghee okwa pumbwa okufuta N$100 000 opo omayoka a kufwe mo.
Molwa oumbada, omukulupe vati okwa ya kombaanga nokunana ko oshimaliwa ndele te shi yandje kondudu.
Vati konima yoku yandja oshimaliwa omukainhu ou okwa pewa oihemba opo a ka longife keumbo ashike okwa didilika kutya omiti odo a pewa odoipupulu.
Konima yefimbo eshi omukulupe a fika keumbo okwa didilika kutya okwa tulwa mokatoo molwashi ka kwa li e na oudu shili wonhumba ou a lombwelwa kondudu.
Onghee okwa ya kopolifi noku patulula oshibofa naashi osha eta opo ondudu i kale ya shunifa ko oshimaliwa shaye.
Opolifi oya kumaida oshiwana opo shi kale sha kotokela eendudu molwashi eendudu dopaife onde li ninga oikengelela
fhamalwa@nepc.com.na