Opolifi moshitukulwa shaShikoto otai konakona oshibofa omo omukulupe weedula 66 vati a monifwa oshiponga kokwooko komonamati.

Oshiningwanima eshi osha ningwa Omaandaxa komukunda Onathinge efimbo loufiku meumbo lavo.

Omupopiliko wopolifi moshitukulwa shaShikoto Chief Inspector Ellen Nehale-Kangulu okwa ti omufekelwa okwa li ta tanguna naina, pefimbo e mu ponokela. Nehale-Kangulu ta ti fiyo opapa omufekelwa ina kwatwa po, ashike omakonakono opolifi otaa twikile. 

Oshiningwanima shikwao, omukainhu weedula 38 okwa monifwa oshiponga komilungu nokombuda eshi vati a lumatwa komukainhu mukwao.

Oshiningwanima osha ningwa komukunda Uuyoka moshikandjohoololo shaNayena mOshikoto efimbo loufiku.Otaku hokololwa kutya ovakainhu ava okwa li tava tanguna naashi osha eta opo omukainhu ou a ponokele nokulumata mukwao. Omufekelwa ina kwatwa po onghee omakonakono opolifi otaa twikile.

Okwa didilikwa oshiwana shihe hole okulopota omahepeko omomaumbo pefimbo unene tuu ovaholafani.  Onghee opolifi otai kumaida oshiwana opo shi kale alushe tashi lopota omahepeko omomaumbo pefimbo opo ku kelelwe ekanifo leemwenyo ile ovanhu tava monifwa oshiponga.

- fhamalwa@nepc.com.na