ONGWEDIVA - “Ondi shi shi kutya shoka nda ninga osha puka na inandi hala okumana po ethimbo lyohofa,” osho omukwati gwaantu koonkondo kamana anuwa, Jeremia van Wyk a ti sho a holoka mohofa molwa ekwato koonkondo lyokanona okashona.

Omulumentu ngoka gwomimvo 50 sho a holoka komeho gomupanguli ohela ta tamanekelwa ekwatopo mbambyona lyokanona komivo ntano (5) nokukakwata koonkondo, okwa lombwele ohofa kutya oku na ondjo.  Van Wyk anuwa ngoka e shiwike kaavali yokanona hoka, okwe ka kutha pokinda moKhomasdal, ee te ke ka longela iilonga yomuyonena paihulo. Sho a mana okwa yi nako koKatutura hoka oko a ka kwatelwa. Aavali yokanona anuwa oya haluka sho ya mono kutya okanona kawo oka kuthwa ko kokinda komuntu gumwe i ili nando kaya li ya gandja epitikilo ndyoka. Aavali pamwe nopolisi oya tameke okukonga okanona kosocial media. 

Omukiintu gumwe ngoka a mono omathano gokanona ge li koFacebook noWhatsapp, okwa dhimbulula okanona hoka ka li owala ke li omutumba mokoona yondingosho inaaka zala ombindja nonande okwa li ku na uutalala. Sho e ka ithana kedhina ndyoka a mono kosocial media, Van Wyk ngono a li pehala mpoka ta dhenge omangandja okwa haluka e ta fadhuka po. Omukiintu okwa kugu onkugo, naakwashigwana oye shi pondola okukwata Van Wyk ngoka a li a kolwa ye ishewe omukokele. Opolisi oya adha e li momake gaakwashigwana. 

Miiningwanima ishewe yomahepeko gaanona paihulo, uunona une wu li pokati koomvula ntano no11 okwa lopotwa wa kwatwa koonkondo miiningwanima ya yooloka, ayehe oya ningilwa omiyonena kaapambele yawo.  Omukwatakanithi gwomakonaakono giimbuluma moshitopolwa shaShikoto, Deputy Commissioner Naomi Katjiua okwa koleke itatu yomiiningwanima mbyoka.

Otaku popiwa kutya okanona koomvula 11 okanasikola kEtaneno Combined School oka kwatwa koonkondo sho ka zi kosikola mEtitano anuwa kuhekulu gwoomvula 48. Oshiningwanima shika osha ningilwa pOnankali. “Otaku fekelwa kutya nakuningilwa omuyonena okwe ya megumbo a zi kosikola omanga aakuluntu ye ya li ya ya kolukanda. Okwa yi a ka hule omuzalo gwe gwosikola mondunda, omanga ti ihula ngaaka, nakufekelwa ngoka okwe mu nanene kombete nokwe mu kwata koonkondo,” Katjiua ta ti ngaaka. Nakufekelwa okwa tongololwa kutya oFillemon Shikongo nokwa mangwa po nokwa holoka mompangau yaNdangwa ohela.

Oshipotha oshikwawo ooshoka shuukadhona uyali wu na oomvula 6, shika osha li sha lopotwa mEtitatu lyoshiwike sha za ko mOndjambayonghalu moshikandjohogololo shaKankolo. Otaku tiwa nakufekelwa omunamimvo 19 ha hiti osikola e li mondondo ontihetatu.

“Otaku tiwa omufekelwa ngoka omumwayinagona guunona mbuka okwe wu kwata koonkondo manga aakuluntu ya li ya ya kuundingosho,” Katjiua ta ti wo kutya omufekelwa okwa mangwa po.
Okwa lopotwa ishewe okanona komimvo ntano ka kwatwa koonkondo komukunda Onghalulu kOkongo, naafekelwa oya kwatela mo ngoka a li nale ohonda ya yina yokanona. 

Omufekelwa anuwa okwa ithana okanona pethimbo kali ka kotha nuunona uukwao mboka uushona ku ko, anuwa ta ti oteke ka pa oontantahe. Okwa yi nako momuthitu moka eka longele iilonga yuuhwapindi. Yina yokanona okwa dhimbulula esiku lya landula ko kutya kaka li taka vulu okweenda, ko ishewe okwa li pononoka oombinzi momagulu. Okwe ka fala koshipangelo hoka ka monika kutya oka kwatwa koonkondo.  
-Uuyelele wumwe: Obrien Simasiku naEmmency Nuukala