Festus Hamalwa

“Onda kengelelwa komufitaongalo molwaashi okwa tula nge mokatoo konima a ya moixulo naame. Okwa ti ota pe nge oilonga mopolifi shaashi vati okwa fika po puShikongo ashike ine shi ninga konima eshi twa ya naye moixulo. Paife kandi na vali ombili shaashi ohandi vele mendjandja lokonima sha etwa eshi da dengwa konima kutate momuhongi.”

Aa omatumbulo omulumenhu aJeremia Mushunina weedula 24 ta hokolola nghene vati a kengelelwa komufitaongalo kongeleka yaElcin koRuacana, Hendrick Shuudeni ou vati va ya naye moixulo lwoikando ya yooloka.

Mushunina okwa lombwela Kundana ta ti okwa udifwa nai kuShuudeni eshi vati e mu kengelela noku mu pula va ye naye moixulo ashike Shuudeni vati ina wanifa po eudaneko olo e mu udanekela.

Onghee okwa ti pula Shuudeni opo a kale e mu futa oshimaliwa molwashi okwe mu ningila omunyonena wopaixulo noku mu tula mokatoo.

Mushunina okwa patululila oshibofa kopolifi mOhangwena konima eshi vati a ningilwa omatilifo kuShuudeni kutya ote mu dipaa.

“Okwa ti ota tumine nge ongudu yovanhu va dipaye nge ndele naye mwene te lidipaa. Onghee naashi osha eta opo ndi patulule oshibofa shoku ningila nge omatilifo molwaashi paife onda tila okudipawa,” ta hokolola.

Mushunina okwa hokolola ta ti omudo wa dja ko okwa ya koWindhoek opo a konge oilonga molwaashi ta dengwa koluhepo.

Okwa ti okwa li a nangala poshitaashi shopolifi poWanaheda molwaashi kakwa li e na apa ta di.

“Okudja opo otwa kwatafana naShuudeni koFacebook nokulipa eenomola deengodi detu. Okwa dengela nge nokonima otwa shakena kolukanda Freedomland moWindhoek,” ta ti.

Okwa ti okudja opo Shuudeni okwe mu pula opo va ye naye moixulo, ta ti kutya ote mu pe oilonga mopolifi.

“Otwa ya naye moixulo konduda yakaume kaye, nokonima eshi twa mana okwa pa nge N$100 yolupandu. Okwa udanekela nge yoo vali kutya ota kwafelenge nakeshe shimwe nda pumbwa,” ta hokolola.

Mushunina okwa ti okudja opo okwa shuna kOwambo molwaashi ine ke shi pondola vali okumona oilonga moshilando.

“Onda ya kOwambo, Shuudeni okwa kala alushe ta kongo nge ta pula nge natango tu ye naye moixulo. Okudja opo otwa shakena kOnhuno neudo muMaalisa ndele hatu ka nangala naye monduda yovaenda hai futilwa nokuya naye moixulo lwoshikando oshitivali,” Mushunina ta ti.

Mushunina okwa ti okudja opo okwa pula Shuudeni kombinga yoilonga ei e mu udanekela ashike okwe mu lombwela vati ta ti na ngungumane.

“Okwa lombwela nge ta ti okwe lipyakidila nokupopya naJoseph Shikongo, omukulunhu wopolifi moNamibia. Efiku limwe okwa tumina nge N$300 opo ndi ngungumane nokonima yefimbo onda twikila oku mu pula oilonga. Okwa twikila nokutumina nge N$700 nokulombwela nge ndi ngungumane,” Mushunina ta hokolola.

Okwa ti efiku la landula ko okwa twikila nokupula Shuudeni kutya oilonga oi li peni ei e mu udanekela.

“Onde mu lombwela kutya ohandi mu lopota kopolifi nokovatoolinghundana. Okudja opo okwa tumina nge N$2 000 opo ndihe shi popye,” ta ti.

Chief Inspector Victor Halundilo wopolifi moshitukulwa shaHangwena okwa koleka ta ti Mushunina okwa patulula oshibofa shokuningilwa omatilifo edipao kuShuudeni oshivike sha dja ko.

Halundilo okwa ti konima eshi opolifi ya ninga omakonakono kombinga yoshikumungu eshi, okwa monika ouyelele tau ulike kutya Shuudeni naJeremia vati ova kala mekwatafano lopahole.

Okwa weda po ta ti omakonakono opolifi otaa twikile moshikumungu eshi.

Ina yaMushunina okwa nyenyeta ta ti Shuudeni na kale a kwatwa po diva molwaashi okwa longa oshimbuluma sha kula shokuya moixulo nokaana kaye kokamati.

“Otwa kumwifwa koshiningwanima sha longwa komufitaongalo a ya moixulo nokaana kange. Paife okaana kange kake na vali ombili eshi haka pwaalala alushe meumbo molwaashi otaka piyaanekwa komadilaadilo,” ta ti.

Otaku hokololwa kutya Shuudeni paife okwa kwatwa komhepo yokulimangeleka konima eshi Mushunina a andjaneka ouyelele moshiwana.

Vati Shuudeni okwa tumina Mushunina etumwalaka kutya ote limangeleke.

Eshi a kwatafana naKundana omufitaongalo Shuudeni okwa hokolola ta ti ova shakena naMushunina omudo wa dja ko kOnhuno konduda yakaume kaye ou e li yoo vali kaume kaMushunina.

Shuudeni ou e li xe younona vatano, ye oku li a hombola okwa hokolola ta ti okwa li ta shingi a uka koRundu ashike eshi a fika pOnhuno okwa loloka.

Onghee okwa ti okwa nangala pukaume kaye pOnhuno opo a dule okupita ongula ta shingi.

“Mongula eshi kwa sha Mushunina okwe ya konduda yakaume kange. Otwe lipa eenomola deengodi nokonima otwa ka lya okapana nokudja opo onda twikile ondjila yange,” Shuudeni ta hokolola.

Shuudeni okwa ti manga e li mondjila okwa tuminwa omatumwalaka kuMushunina te mu lombwela kombinga yonghalamwenyo yaye kutya ota dengwa koluhepo.

“Onde mu lombwela kutya ohandi mu kwafele naashi a pumbwa. Okudja opo onda tameka oku mu landela oikutu, oku mu tumina oulityaatya vokongodi noshoyo oku mu tumina oshimaliwa ashike ita dimbuluka kutya onde mu tumina ingapi kumwe,” Shuudeni ta hokolola.

Shuudeni okwa yelifa ta ti okwa yambidida Mushunina molwaashi okuhole okuyambidida ovanhu ve li moluhepo nokwa li a kwatwa komhepo yokuyambidida omunhu e li momhumbwe.

Okwa ti okwe lixula okukwatafana naMushunina omudo wa dja ko muKotoba nonomola yongodi yaMushunina okwe i Dima mo mongodi yaye omudo wa dja ko.

Lopokati opo, Mushunina okwa ti Shuudeni ota popi oipupulu.

“Shuudeni okwa kala ta twikile nokukwatafana naame pangodi. Okwa tuminange N$4 000 kumwe eshi a kala ta heke nge ndihe shi popye kutya otwa ya naye moixulo,” Mushunina ta ti.

Eshi a kwatafana naKundana Wendelinus Ndiwakalunga Hamutenya-Jeremia okwa koleka ta ti Shuudeni naMushunina ova kala ve li mekwatafano lopaihole efimbo lile.

“Mushunina naShuudeni aveshe omashenge. Ove li oilyo yehangano letu lomashenge,” ta ti.

Okwa kumaida ovanyeumbo vomashenge opo va xulife po okuya mekwatafano lopaihole noumatyona molwaashi omashenge ovanyeumbo okwa ninga oihakanwa yokushadaulwa koumatyona.

“Oumatyona paife ove hole oimaliwa. Oumatyona vopaife ove hole okuya moixulo novanyeumbo eshi hava kala va hala okulandelwa eetuwa,” Wendelinus ta ti.

fhamalwa@nepc.com.na