Lasarus Hakwaake
EENHANA – Ehangano lomapekaapeko e na sha neeenghulunghedi, omufyuulukwakalo, oshoyo ounghulungu wOvawambo (NAMLIK) oshoyo Ehangano laNamibia leengulu domapungulilo doikwamifyuululwakalo nenghulunghedi (MAN – Museums Associations of Namibia) ove lipyakidila noku longekida omafiyafanepo oku litanga melaka lOshiwambo. Elongekido eli lokulitanga otali longekidwa okupitila meembelewa dovanashipundi moitukulwa aishe inhe yokonooli. Ehangano eli loNAMLIK (Namibia Research Institute for Indigenous Knowledge) ngaashi la shivika nawa ola totwa momudo 2000 nola shangifwa onga ehangano liheshi lopangeshefa momudo 2016 onga ehangano noshiputudilo osho tashife nokuhadahada oshoyo okushanga oishangomwa i na sha nounongo woshiwana opo eenghulunghedi, omufyuululwakalo, oshoyo oughulungu woshiwana u tulwe moishangomwa opo u shivike nokomapupi ta e uya.
Omukulunhuwiliki nomutotipo wehangano eli Helena Iitula okwa shoshonena ko oshifo eshi nghee shi li sha fimana opo ku kalekwe po eenghulunghedi doshiwana, unene ngaashi oitevo, omaudano, eengano, oyiimbo yOshiwambo oshoyo okulitanga shaashi eshi osho tashi longo oshiwana onakudiwa notashi ka kala shipu ounona va shiive onakwiiwa noupu.
Okwa tofa mo kondadalunde kutya okulitanga oko ombinga imwe younghulungu wOshiwambo kwa kala kwa liwa oshipungo ngeenge tashi uya pomapekaapeko oshoyo omatuvikilo. Opo okwa ti ngeenge owa pwilikine nawa komunhu te litange nena oto dulu okulihonga shihapu kombinga yondjokonona, oupuna welaka, omufyuululwakalo, eenghulunghedi, omaliumbato, omalihafifo oshoyo okulihonga okupopya. Mopaife ngaha omikanda dokulishangifa momafiyafanepo otadi hangwa keembelewa dookamusela moikandjohoolo yoitukulwa yokonooli.
Omafiyafanepo aa okulitanga okwa fanekwa a ka ningwe moshivike shokudimbulukwa omifyuululwakalo okudja momafiku 16-22 Sepeteba 2019 osho tashi ka ningilwa moshitopolwa Oshana ponhele tai ka tumbulwa nale. Ovanhu aveshe tava ka ninga omaindilo otava ka pewa omhito nounghulungu otau ka tuvikilwa monduda yomatuvikilo yoikwamifyuululwakalo yoshiwana. Otapa ka kala ovafindani vatatu ovo itava ka shuna keumbo eenyala dongaho. Onghene Helena Iitula ota pula ovanhu va kufe ombinga okuyadeka omikanda domaindilo odo di li peembelewa doikandjohololo aishe opo ve uye va ulike ounghulungu wavo. Omaindilo aeshe otaa ningwa oshali shovene noku na okukala a fika kombelewa yoNAMLIK komaandelo a Juli 2019.