ONGWEDIVA – Erastus Shimwooshili omunadolongo kOmungwelume moshitukulwa shaHangwena a kwatelwepo molwoulunga, okwa ninga ehaelo lokulifutila modolongo omo a kala eedula da fika puhamano tadi ka ninga heyali neudo manga oshibofa shaye shoulunga shi li pokupwa.

Shimwooshili okwa tulwa moipandeko shi na sha noulunga weteyo mOneshila mOshakati mo2016 omo mwa kanene oN$4 000. Omishangwa dokomhangu oda tumbulwa kutya Shimwooshili okwa kala modolongo yaShakati nokonima okwa ninga eindilo opo a tembukile kodolongo yaMungwelume. Shimwooshili vati eshi a ninga eindilo opo a ye kodolongo yaMungwelume, okwa hala okukala e li popepi novakwapata vaye opo va dule oku mu pa omayambidido omanga e li mokakuma.

 Pefimbo Shimwooshili e li mokakuma, okwa kala ta nyenyeta kutya oshibofa shaye otashi ende kashona okuya komesho yee iha dulu okulya oikulya aishe ei hai yandjwa modolongo omolwoukolele waye. Xe ou kwa li he mu landele oikulya okwa tembukila kOkahandja nonghee kape na ou vali ta dulu okuwanifa po eemhumbwe daye. Omishangwa da dja komhangu yaShakati oda yelifa   kutya, Shimwooshili okwa twikila nokuninga eindilo lokulifutila mo opamwe nahahande waye Nicky Ngula oshivike sha dja ko, oo ina holoka nena komhangu shaashi vati okwa pumbwa okufuwa po. Eindilo lokulifutila mo Shimwooshili vati okwe li indila shaashi okwa pewa oikulya ye likalekelwa okudilila koshipangelo ngaashi omai oshoyo oingumutulu yomaludi a yooloka. Omishangwa oda yelifa yoo kutya Shimwooshili mokakuma oku li mo tafi ondjala nokwa pumbwa oku mangululwa meendelelo.

Mangestalata Elvis Mwilima, okwa tumbula kutya oshibofa shaShimwooshili oshi li pokupwa nonghee ka li e wete efimano lokuninga omaehelo okulifutila mo. Okwa ti paife ope na omhito yakula Shimwooshili natango e liwedele ko omafiku okukala modolongo shaashi ove na okulonga mo oshikumungu sheindilo lokulifutila mo.