Opolifi moshitukulwa shaShana otai konakona oshibofa shokaana keedula 10 vati ka kwatwa onghonga kuwalye pefimbo kwa li taka di kofikola.

Oshiningwanima osha ningwa mOngwediva oshivike sha dja ko.

Omupopiliko wopolifi moshitukulwa shaShana Inspekta Thomas Aiyambo okwa hokolola ta ti okaana oka li taka di kofikola navakwao.

Okudja opo ovanafikola vakwao eshi va fika komaumbo avo okaana oka twikila nondjila ka uka keumbo.

Otaku hokololwa kutya okaana oka shakeneka omufekelwa naye a djala omudjalofikola nokonima okwa lombwela okaana opo va ye meumbo lavo.

Okudja opo vati omulumenhu ou okwa longela okaana omunyonena wopaixulo nokufaduka po.

Oshivike sha dja ko okaana keedula 11 oka kwatwa onghonga pefimbo kwa li ka uka kofikola efimbo longula mOndangwa.

Aiyambo okwa hokolola ta ti okaana oka hangika ta ka ende ponhele yokukupula oimbodi nokunukilwa komulumenhu ou ndele te ka kwata onghonga.

Omufekelwa okwa faduka po konima eshi a longela okaana omunyonena wopaixulo.

Opolifi oya kumaida ovadali opo va kale alushe tava findikile ounona keefikola molwaashi okwa didilika ounona va ninga oihakanwa yokukwatwa onghonga ngeenge ve li mondjila.

fhamalwa@nepc.com.na