Ovalumenhu vavali ova patululilwa oshibofa shekwatonghonga konima eshi ovaneumbo lavo va dimbulula okaana kambulavo komido 14 ke na oufimba.
Otaku hokololwa kutya ovafekelwa ava, umwe oxekulu yokaana, mukwao omumwainamati womido 18 ohava di meumbo limwe nokakadona oko. Oshiningwanima eshi osha ningwa omudo wa dja ko pokati kaKotoba naDesemba momukunda Ondiikela moshitukulwa shaShana.
Ouyelele ou owe ke ya kombada konima eshi inakulu yokakadona oko a didilika omutekulu waye e na eteelelo nokonima nakuninga oshihakanwa okwa lombwela inakulu kutya okwa kwatwa onghonga.
Commissioner wopolifi moshitukulwa shaShana Naftal Lungameni Sakaria okwa hokolola ta ti okakadona aka oka kala nokukwatwa onghonga loikando ya yooloka kovafekelwa.
Vati okakadona oka ningilwa omatilifo kutya otaka dipawa ngeenge oka lombwele inakulu onghee oka kala ashike vati taka ningilwa omunyonena wopaixulo kovalumenhu vambulavo.
Opolifi oya hokolola tai ti omufekelwa umwe okwa kwatwa po ashike mukwao naye oku li metifa lokukala a kwakwa po.
Oshiningwanima shikwao, omukwashiwana waAngola weedula 46 ou e li omunailonga keembelewa doukaleliposhilongo daAngola mOshakati okwa kwatwa po eshi va ti a kwata onghonga okaana keedula 12. Oshiningwanima eshi osha ningwa mexuliloshivike molukanda Evululuko mOshakati efimbo loufiku. Opolifi oya hokololwa tai ti omufekelwa ou e li omunashilonga pamwe naina yokaana oko ka longelwa omunyonena, vati okwa kala nokukwata okaana onghonga oikando ya yooloka okudja omudo wa dja ko muKotoba.
Naashi vati oshi li oshikando oshititatu okaana taka kwatwa onghonga komufekelwa oo.
Opolifi oya hokolola tai ti omufekelwa okwa li a ya keumbo oku haku di okaana nokonima okwa ya monduda yavo yokunangala nokukwata okaana onghonga. Ouyelele ou owe uya kombada konima eshi mumwainakadona wa nakuninga oshihakanwa a lopotela ovakulunhu.
fhamalwa@nepc.com.na